- David Zochhuanmawia (Vida Hrahsel Saza)
Khawvel letling tih thupui hmangin thu tawite ka lo ziak tawh a. Khawvel kan chênna hi a letling ta hû e tihna lam a kawk lova, a chhunga chêngte rilru puthmang leh kan nih dan sawifiahna mai zawk a ni.
Entirnan- Chêrin thau an chak a, thauin chèr an chak thung. Sawi thui duah lovang. Kan nih lohna ang zela lang châk hringfâ kan ni a, kan nih lohna ang leh kan neih loh apiang neih châkin kan tuihal a, Pathian hming lam siin amahah kan intulût lo fo zawk a ni.
Samzâi hi a awm lohna tûra a awm chuan thil tenawm leh ṭawpah kan ngai mai a. A awmna hmun tûr dik taka a awm erawh chuan kan duatin kan khuih hliau hliau a. A ṭhenin an oil a, nung taka a lan theih nan fai tak leh tle siauin kan dah ṭhin a nih hi!
Chutiang chiah chuan kan awm lohna hmun tûra kan awm reng hian midang tan thil hnawk leh ngeiawm kan lo ni thei a. Mihring che thei, ngaihtuahna nei, rilru puthmang inang lo tak takte hian kan awmna hmun tûr kan thlan thiam hi a va hun tawh tak êm!
Politics-a hun rei tak tel tawh. Mahse, ram siamna atana mipuiin an awh leh miah si lohte a awm theih a. Kohhran rawngbawl hna chelh ve reng si, Pathian hnen thleng phaka rawngbawl lo pawh a awm theih. Politics-ah hun rei lote awm chunga Pathian ruat ram hruaitute pawh kan nei nghal thung a.
Hun hi Pathian ruat a ni a. A chhunga chêngte pawh Pathian thu ang zela awma che thei kan ni. Sumin nunna a lei thei lo ang bawkin thihna kut vâwtin mi hausa leh rethei a thliar hrang lo bawk. Mi hausa an awm a, an hausakna hmanga duh duh ni theia inngai tam tak an awm a, lawmna tluantling erawh a ni lo thung.
Khawvel kan damchhungin sum hi a pawimawh a, kan eiin mamawh min phuhrûk bakah silhfen thlenga engkim lei ngai anih tâk avangin a hlu a ni. Mahse, Lalpa ṭawngṭaina kan sawiin nitin eikhawp kan dil a, a bak kan dil hran lo. Nitin eikhawp bak aia chuângliam neih duh ṭheuh kan nih tâk avangin kan awm lohna tûr hmunah hian mi tam tak chu kan awm a ni mai lo maw?