Footballer tha leh ropui tak tak, hliam vanga an nih tur ang ni phak lo, an thlen tur ang thleng pha ta lo. Beisei phak lova chuai zui a, uiawm tak tak an awm a. Tun tumah hian hliam vanga nih tur ang ni phak lova chuai zui ta mi 13 kan tarlang ang.
- Jonathan Woodgate
Centre back tha tak mai Woodgate hian Leeds United-ah tha takin bul a tan a, Leeds tan a khelh that vangin team lian zawk Newcastle United in an la lut zui leh. Newcastle United-ah kum khat chauh a khel hman a, khawvela football club ropui ber Real Madrid in beiseina sang tak nen an la lut zui leh nghal. Real Madrid-a beiseiawm takin bul tan mah se hliam na tak a tuar a, a hliam vangin thla 17 chhung zet a team thar thar a khel thei lo nghal pang. A hliam dam hnuin ngai a awh tak tak thei tawh lo va, Real tan hian kum thum chhungin La Liga-ah vawi 9 chauh a khel.
Real Madrid-ah hmun pawimawh a chan phak tak loh vangin loan a chhuak ta hial a, Middlesbrough leh Tottenham tan khel zui leh bawk mah se par a chhuang tak tak thei tawh lova, a zuih ral zui ta a ni.
- Yoann Gourcuff
Zinedine Zidane te nena lar rual, attacking midfielder tha zet mai Gourcuff hi Bordeaux-ah a vul hman a, league leh League cup-ah kum 2009 khan an champion khawp a, a hming a chher hman hle. Kum 2010 khan Lyon in beiseina sang tak nen an la lut a, hliamin a tihbuai zui tak vangin beisei a phak ta lo viau thung. Hliamin a tihbuai nasat vangin a hun tawp lam a khar chhe hle a. Club nei lova a awm reng hnuin kum 34 mi lek ni chungin football a chawlhsan zui ta hial a ni.
- Abou Diaby
Premier League club lian Arsenal chuan France midfielder Abou Diaby hi kum 2006 khan beiseina sang tak nen an la lut. Arsenal a zawm tirh lam hian club leh ram tan a chetha viau a, France leh Arsenal tantute a tiphur hle nghe nghe. Gunners tan a hun hmasa thla ruk chhung tha takin a khel a, ‘Patrick Vieira thar’ tih a hlawh hman hial. Sunderland nen an inhmachhawn tumin na takin a inhliam a, he tang hian ngai a awh leh tawh lo. Arsenal-ah hian kum 2015 thleng cham bawk mah se EPL-ah vawi 124 a khel a, goal 14 a thun. Arsenal a chhuahsan hnuin a zuih ta viau a, kum hnih chhung Marseille-ah hun a hman chhungin vawi nga chiah a khel a, a chuai zui ta a ni.
- Louis Saha
Manager ropui Sir Alex Ferguson chuan Fulham an hmachhawn tuma khingpui hautak ni thin Louis Saha a la lut. Saha hian United-ah vul a tan tha viau a, a khelh hmasak 14-ah goal sarih a thun nghal der. Bul tan tha viau mah se hliamin a tihbuai vangin a pawimawhna a hloh zui thuai a, khelhna hmun a chang phak leh tawh meuh lo. Beiseina sang tak nen an lak luh Saha hi km 2008 khan Everton lamah an chhuahtir zui ta hial a ni.
- 9. Jack Wilshere
Ball thiam, taima leh huaisen bawk si Jack Wilshere hian kum 16 mi lek a nih laiin Arsenal tan a khel tan der tawh a. A hun lai hian Arsenal tana khel thei naupang ber record a siam hial nghe nghe. Ball a thiam em vangin England captain la ni hial tura ngaih a ni. A lakah beiseina sang tak an neih laiin a ngal ruh a tliak a, hun rei tak a chawl. A hliam dam hnuin ngai a awh leh tawh lova, a hnungtawlh zawngin a kal ta zui ta char char. Footballer ropui tak ni ngei tura ngaih kha hliamin a tihbuai nasat vangin kum 30 mi lek ni chungin football a chawlhsan a lo tul ta a ni.
- 8. Thiago Alcantara
Manager ropui Pep Guardiola hian Alcantara hi thiam an ti mai mai khawp a, kum 2013 a Bayern a enkawl khan player pakhat chauh lak luhsak turin a ngen a. A lak duh awmchhun chu Alcantara hi a ni. Ball thiam, fing bawk si hian thiamna ril tak nei bawk mah se hliamin a tibuai nasa a, club lian tak takah khel thei bawk mah se beisei angin a khelchhuak zo ta lo zel thung.
- 7. Mario Gotze
Gotze hi World Cup 2014 final-ah khan Germany manager Joachim Low chuan champion na goal thun turin a luhtir a. Goal thun tura luhtir a nih ang ngeiin mawi zetin a pet goal a, Argentina hnehin an champion zui ta nghe nghe a nih kha. Liverpool manager ni mek Jurgen Klopp chuan Gotze hi player a enkawl tawh zawng zawnga rawlthar tha ber a nih thu a sawi. Borussia Dortmund-ah a vul laiin Bayern Munich a pan a, hliamin a tibuai ngun bawk nen beisei a phak lo zui. Club hrang hrangah khel kual zui mah se beisei a phak thei tak tak tawh lo a, a thawm a dai zui ta hle a ni.
- 6. Paul Pogba
Club lian Manchester United leh Juventus tan khelin, player pawimawh ni bawk thin mah se Pogba hi hliamin a tibuai ngun a, a nih tur ang a ni thei tak tak thin lo. Inelna hrang hranga champion zingah telin, World Cup-ah meuh champion tawh mah se hliamin a tihbuai thin vangin a ropui tur angin a ropui phak lo thung.
- 5. Adriano
‘Ronaldo tak tak’ an tih thin hmunruak luah tlak khawpa thiam leh thahrui nghah, khawi lam atang pawha goal thun thei mai zel Adriano hi Inter Milan-ah a vul hman hle. San Siro-ah bul tan tha viau mah se hliam a neih bakah a pain a boralsan zui tak vangin a talbuai zui a, hming chher lian lutuk lovin a tham ral zui ta a ni.
- 4. Marco Reus
Marco van Basten thar tia hiala an sawi hman Reus hi a lar chak a, a lakah beiseina sang tak an nei. A lakah beiseina sang viau mahse hliam a neih theih em vangin a tum ram a thleng phak lova, ropuina ramah a vul chhuak zo ta lo a ni ber mai.
- 3. Michael Owen
Ball thiam, tlan chak bawk si Michael Owen hian kum 21 mi lek a nih laiin football a chawimawina sang Ballon d’Or a dawng hial tawh. Liverpool tan a khel tha thei hle a, England tan player pawimawh tak a ni bawk. Liverpool atanga Real Madrid a zawm hnuin hliamin a lo tibuai bawk nen beisei a phak thei tawh lo va, Anfield team angin a khel tha thei tawh lo. Real Madrid-ah a hlawhchham hnuin Manchester United in an la lut leh a, United-ah pawh a vul thei ta meuh chuang lo. Hliamin tibuai nasa lo se, Ballon d’Or dawn belh ngei tura ngaih a ni a, hliam vangin a vul zo ta lo thung.
- 2. Ronaldo
‘Ronaldo tak tak’ tia sawi thin leh striker tha bera ngaih la ni reng Brazilian Ronaldo hian football-a chawimawina sang Ballons d’Or vawi hnih a dawng a. World Cup-ah Brazil a champion pui bakah mimal chawimawina a dawng nual bawk. Heti khawpa ropui leh hlawhtling hi hliam vangin a nih tur ang a lo ni phak lo ve reng chu niin.
Ronaldo hian kum 23 mi lek a nih laiin a khupah hliam na tak a tuar a, hei vang hian season thum chhung ngawt a inkhel thei lo. A hliam a dam hnuin tunhmaa a ropui angin a ropui tak tak thei tawh lo a, a nih tur ang a ni phak tawh lo. Hliamin tibuai lo se Ronaldo hi a ropuina leh zual hle in a rinawm.
- 1. Marco van Basten
Marco van Basten hi goal thun tura thiamna famkim nei, goal thuntu ropui a ni a. European championship 1988-ah Netherlands champion na goal a thun phei a ropuiin, ngaihhlut a hlawh hle. Player ropui tak ni bawk mah se August 1995 khan football a chawlhsan thu a puang. Football a chawlhsan lai hian kum 30 mi chauh a la ni a. Kum 30 mi lek ni chunga football a chawlhsan chhan chu hliamin a tihbuai vang a ni.