MNF party chuan thuchhuah siamin, Assembly Budget Session meih mek ni 11 March, 2024 a kan Chief Minister zahawm takin kan Police huaisen tak tak, thih huama Assam Police pawh kap ngam tute hmusit tak ‘kut vung ber bur leh ke vung ber bur’ anga a chhuah mai te, rintlak awm lo ang maia kan pasalthate a chhuah mai hi pawi kan ti a. CM thusawi hi Mizoram Police te hmuhsitna leh a changtu Minister ngei pawh a dahhniamnaah MNF chuan a ngai a. An thatna lam hmuhpui lova, an zinga mi tlemte te dinhmun an zavaia dinhmun ang maia Mizoram rorelna sang bera a sawi chhuak duh hi a pawi kan ti takzet a. Kan police zawng zawng deuh thaw te hi ram tana nun hlan ngam an ni tih leh an hotute thupek anga huaisen em em thin te an ni tih hi MNF ngaihdan a ni, an ti.
Hetianga hnam dangte pawhin min zuam theihna tura kan Police te a chhuan chhe zawng a sawi hi a pawi kan ti a. Hetiang thu hi sawi nawn tawh lo turin Chief Minister hi MNF chuan a ngen a ni, an ti bawk.
Hetih mek lai hian Sub Inspector, Armed Branch lama departmental promotion exam naah thil fel lo tak a awm niin MNF chuan a hria a, kum 2019 MNF sorkar lai khan Havildar atanga, Sub Inspector Armed Branch, Deparmental promotion exam buatsaih a ni a. Mi 45 lai an kaisan tir an ni a, Covid-19 avangin kum 2020 leh 2021 exam buatsaih theih a nih loh avangin promotion exam tur pawh hi an tam hle rualin lungawi lo leh complaint siam an awm lo a ni.
Kum 2022, September-ah Armed Branch a mi tur Sub-Inspector, Departmental Promotion Exam hi buatsaih a ni leh a, mi 25 in promotion an hmu leh a, complaint leh fair lo ti a sawi a awm chuang lo, an ti a.
Kum 2023 inthlan kum a nih avangin MNF sorkar khan buatsaih hman ta lovin, sorkar thar ZPM party sorkar lo piangin, January ni 29 – 5 February, 2024-ah Armed Branch SI hi exam buatsaih a ni ve ta thung a ni. MNF sorkar khan buatsaih hman se chu vuina a awm lo ngei awm e, tun exam hi Havildar mi 224 in an hmachhawn a. Exam tura an inbuatsaih lai hian an zirho nasa hle a, practical a tam avangin, an thiam dan pawh an inhretawn hlawm hle a, Silai khawih dan hrang hrangte bak ah, Forces hna dang hrang hrangte pawh an zir nasa hle a ni. Exam turte hi an in hre chiang hlawm hle a, kum 20 chuang lo service ho tawh an lo ni bawk nen, Havildar ni tur pawh hian Training Junior Under Officer Course thla thum leh Senior Under Officer Course thla thum lo paltlang ho tawhte an ni hlawm a, an in hre chiang viau tura ngaih an ni, mahse, an result a rawn chhuak a, ti ve mai mai leh tel ve hrim hrim a an hriat kha an promotion ta nual si a, practical exam lai a, tih ngaihna hrelo leh tisual nasa em em te kha hlankai zawkah an tang a. Silai thiah darh ngaihna hre miahlo leh parade command pawh tisual chiang em em, board officer te hial pawhin an hrilh chawpte pawh an tling zawk ta daih a. Physical lamah pawh tha tawklo, operation duty neih ngai pawh nise an tirh ngam loh tur, taksa lama fit tawk lo te pawh an la kaisang ta zel bawk a ni, an ti bawk.
Sorkar thar hnuaia exam hmasak ber hi a tha tawk lo hle niin a hriat a, tling leh tha tam tak an awm laia min venghimtu tur ber te induhsakna uchhuak tak hmanga, ZPM sorkarin kan Home Department a suasam ta mai hi MNF party chuan pawi a ti takzet a, practical leh written an exam na hi video a cover vek a niin ennawn leh vek turin MNF chuan a phut tlat a ni, tiin an thuchhuahah chuan an tarlang.