- Dr. C. Lalrampana
A KAMKÊUNA
India Constitution-ah hian Hindi hi India Danpui Article 343(1)-in a sawi angin, Hindi Devanagari script chu Union official language a ni ang tih a ni a. Hindi hi India rama scheduled language hman tam ber a ni a, union official language pahnih zinga pakhat a ni a, pakhat zawk chu English a ni. Article 343-ah chuan: Union official language chu Devnagari script-a Hindi a ni ang. Union official thil atana hman tur number form chu India number international form a ni ang tih a ni.
SCIENTIFIC LANGUAGE
Hindi hian Sanskrit ang chi script hlui tak tak a hmang a, chu chu Devnagari Script a ni. India rama tawng tam tak hman thin hi Hindi atanga lo chhuak a ni a, Punjabi, Gujarati, Marathi etc. Devnagari- Hindi script source hi khawvela natural & scientific script ber anga ngaih a ni.
Hindi hi khawvela first language hman tam ber palina a ni a, Mandarin, Spanish leh English dawtah a awm. Urdu tawng inhriatthiam tawnna nen chhiar dun chuan khawvela tawng hman tam ber pathumna a ni a, Mandarin leh English dawttu a ni.
Hindi hi kum 2019 chhung khan khawvela tawng hman tam ber 3-na a ni a, tawng hmangtu maktaduai 615 an awm. World language database Ethnologue 22nd edition-ah chuan English chu a chung berah a awm a, tawng hmangtu maktaduai 1,132 an awm. Chines Mandarin chu pahnihnaah a awm a, tawng hmangtu maktaduai 1,117 an awm. Hindi nep lohzia a lang chiang hle.
OFFICIAL TAWNG
Official language angin Hindi hi sorkar inbiakpawhnaah te, parliamentary proceedings-ah te, official document-ah te hman a ni. Hei hian administrative leh governance system te chu a thawk tha thei hle a ni. Hindi hi khawvel pum huapa tawng hman tam ber zinga mi a nih avangin international level-ah pawh a pawimawh hle. Hindi zir hi India rama chengte tan a pawimawh hle a, ram chhunga inbiakpawhna hmanraw bulpui ber, sorkar, zirna, cinema, media, leh sumdawnna lama hman a nih avangin. Hindi thiamna hian India hnam nunphung leh khawtlang nunah hriatthiamna thuk zawk leh inzawmna a siam thei a ni. Hindi tawng lo chhuahna hi Sanskrit atanga lo chhuak direct a ni a, 769 AD atanga intan a ni. Hun kal zelah he tawng hi a lar chho zel a, a tirah chuan ‘Old Hindi’ tia hriat a ni a, Delhi chhehvel hmun hrang hrangah an hmang thin. Delhi tawng hman hmasak ber a ni a, Modern Hindi leh Urdu tan pawh pi leh pute hna a thawk a ni. September 14, 1949 khan Hindi hi Union of India official language atan official takin an hmang tan a, kum 1950 khan Devanagari script hmanga Hindi hi India ram official language atan puan a ni.
HINDI HMAN LOHNA
Hindi hi official language atana hmang lo State-te chu hetiang hi an ni:- Andhra. Pradesh, Arunachal Pradesh, Assam, Goa, Jammu & Kashmir, Karnataka, Kerala, Maharashtra, Manipur, Meghalaya, Mizoram, Nagaland, Orissa, Punjab, Sikkim, Tamil Nadu, Tripura leh West Bengal-ahte a ni. Heng state 18 tih lohah hi chuan Hindi hi hman vek a ni. State 28 leh UT 8 zingah a tam berte’n Hindi hi tawng tualleng berah an hmang mek a ni. Non-Hindi speaking state 18 zingah pawh hian Hindi hmelhriat lo an tlem hle. Heng zingah hian Mizoram hi Hindi thiam lo tamna ber leh hnufum ber kan ni.
HINDI PROMOTION
January 21, 1972-ah Mizoramin Union Territory kan hmuh atang khan Directorate of Education a lo piang nghal a. February 20, 1987 khan India rama State 23-na ni turin State puitlingah hlãn kai kan ni. Kum 1989 kuma Directorate of Higher and Technical Education a indan atang khan Directorate of School Education tia her rem a ni a, tun thlengin hman chhunzawm zel a ni. Hindi tihhmasãwna tihlãr, chawisãn (Promote) a nih theih nan Kum 1973-1974 khan Directorate of Education-ah Hindi Wing dah tan a ni a, a tirah chuan AHPO pakhat, office clerk pakhat leh IV grade pakhatin an enkawl thin. Office staff dah belh zel an ni a, Feb. 26, 2004 atang khan Deputy Director of Hindi leh Superintendent 1 dah a lo ni ve ta hial a ni. Deputy Director of Hindi pui bawm tura thawktu dang Hindi Wing-a awmte chu:
HEO-1 Superintendent-1
ÀHEO-2
Office Assistant-1 (post ruak)
Driver-1, Peon-1 an ni.
A hnuaia tarlan ang hi Directorate of School Education hnuaia Hindi tana thawktu hrang hrang awm zat chu a ni:
Deputy Director (Hindi)-1 (post ruak); HEO 9 (post ruak 2); Supdt- 1; AHEO-19 (post ruak 12); : Assistant 1 (post ruak);
UDC 1 (post ruak); H/S Hindi Teachers : 101; (48 post ruak)
M/S Hindi Teachers : 430 (162 post ruak); CSS H/Teacher – 850-(1post ruak-samagra) Heng post fill up loh tam takte hi Sorkar sum harsatna avangin hnawh khah tura rawtna thlen thin ni mah se tun thlengin hnawh khah theih a la ni lo.
TUN DINHMUN
Tun dinhmunah samagra hnuaiah CSS Hindi zirtirtu 849 an awm mek a, samagra staff pangngaite a ngheta dah rawtna a awm mek nia a lan laiin Hindi lam erawh an tel lova ngaih thah mek an ni. Kum 2011 khan CSS Hindi Teacher 1305 lak an ni a, Mizoram sorkarin State plan-ah a hip luh (absorb) theih loh avangin kum 2017 khan terminate vek an ni a, an khawngaihthlak hle. An ruala lak Nagaland-a CSS Hindi Teacher 1378-te erawh an state sorkarin state plan-ah a absorbed avangin tun thlengin an la thawk. Hindi stream-a thawktute hian ngaihsak an hlawh lo hle a. Mainstream-a zirtirtu (general teacher) post ruak tam tak fill up a ni tawha a lan hnuah pawh regular Hindi Teacher post ruak 300-400 vel awm mekah pakhat mah fill up phalsak an la ni ve lo. Mithi leh retirement-a kalte hmun ruak a tam tual tual a, reiloteah an la artelukawn thei mai dawn a ni.
A TLÃNGKAWMNA
Hindi dinhmun leh pawimawhzia kan hria a, kan politician-te hian Parliament House-ah duhtawkin Hindi-in thu sawi ve thei phei se’ng chuan tun ai hian development hrang hrangah hma kan sawn ngei ang. Ministry of Education, Higher Education hnuaiah language development plan & project hnuaiah Central hian sum a ngah êm êm a, plan & project kan thlen thiam tawk loh avangin Hindi tihhmasawnna kawngah daltu kan insiam mai zawk a ni. Hindi Language Laboratory, propagation centre, promotion wing, research wing, leh Hindi directorate thleng din turin State sorkar hian G2G hmangin rawtna mumal tak central-ah thlen se Hindi stream hi changtlung taka kalpui theih a ni. Kum 2014 khan MHRD Jt. Secretary chuan-”Hindi tan sum hman loh, hman bang, pawisa kir kan ngah lutuk a, hnathawk tlem record kan nih avangin pawisa kumthar atang chuan hman zawh zel dan ngaihtuah a ngai a ni” a ti hial. Hetih laia Hindi stream tana ruahhmanna tha zawk engmah a awm ve ngai lo hi a vanduaithlak takzet a ni. Tuna samagra Hindi Teachers 850 lek pawh hi a ngheta dah tura rawtna a awm ve miah lo te, regular Hindi Teacher post ruak fill up phalsak ve miah lohte hi state sorkar mawhphurhna liau liau a ni. Chuvangin, kan sorkar mipui sorkar hian Hindi stream thuam chak (strengthen) nan ruahmanna tha zawk siamin sorkar laipuiah thlen vat se Zoramah Hindi hmasawnna chak zawkin a kal thei bgei ang. Tin, NEP milin Primary Sikul zawng zawngah Hindi Teacher dah turin proposal siam bawk se, kan ram zirna hian nasa takin hma a sawn ngei ang. Mahni ram leh hnam tawng Hindi thiam mumal lova kan awm rengte hi zah nachang hriat a hun tawh hle.