March 13, Nilai zan khan UEFA Champions League, last 16 khelh chhunzawm a ni a; Borussia Dortmund leh Atletico Madrid ten hnehna changin quarter-final an lut.
- Sancho a nui ve leh ta
German club lian Borussia Dortmund chuan Mimualah 1-1 a an inhnehtawkpui tawh PSV Eindhoven chu Signl Iduna Park-ah an mikhual a, an mualah si hnih faia hnehna changin quarter-final an lut. PSV an hneh tum hian Manchester United a hun hreawm tak hmang Jadon Sancho chuan goal a thun a, ‘Pplayer of the match’ ah thlan ni nghe nghe in, hlim vangin Sancho a nui ve leh ta.
Borussia Dortmund hian an mualah an khel tha viau a, goal an thun thuai. Inkhel tan atanga minute thumna lekah Jadon Sancho chuan Brant siamsak atangin hmahruaina goal a thun. Sancho hi Borussia Dortmund-ah ngei hian a lo vul tawh thin a, EPL club ropui Manchester United in manto takin a leichhuak. United a zawm tirh lamah khel chhe lem lo mah se manager Erik ten Hag nen an inhmuthiam lova, hun hreawm tak a hmang. United tan khelhna hmun a chan ve theih tak loh vangin Dortmund lamah loan in a kir leh a, Dortmund tan hian a vul nawn leh. Sancho hian Dortmund tan champions league home game a khelh hnuhnung pali-ah goal li a thun a, assist vawi thum a nei tling bawk. Sancho ze dik tak kha Dortmund in an haichhuahsak leh ta a, goal a thun lai hmuh tur a awm leh ta fo.
Hma taka goal an thun vangin Dortmund an phur a, an mualah inrintawkna sang tak nen inlan mah se goal an thun belh har viau thung. Dutch club lian PSV pawhin an si phurh sut tumin tan khawh viau mah se goal an thun thei lo tluan. Hun rei tak chhung goal a luh belh theih loh hnuin hun tawp dawn tep-ah Dortmund in goal an thun nawn leh. Dortmund tan hian hun tawp dawn hnaih minute 90+5-ah Marco Reus chuan Fullkrug siamsak atangin an goal hnihna thunin, an chakna a nemnghet. PSV tan an si phurh sutna hun a awm ta lo va, German club lakah 2-0 a tlawmin, champions league atangin an puanthuah an tel.
Tarlan tawh angin Borussia Dortmund leh PSV Eindhoven te hi first leg-ah 1-1 in an lo inhnehtawk tawh a. Second leg-ah 2-0 in Borussia Dortmund in hnehna an chang a, Dortmund hian si belhkhawmah 3-1 hnehna changin a thiam zual pariat zingah an inhlangkai. Hei hi kum thum hnuah Champions League quarter-final a khelh lehna hmasa ber tur a ni.
- Atletico in Inter an lehthal
Italian Serie A lama khel tha tak Inter Milan chuan La Liga club lian Atletico Madrid chu 1-0 in an hneh hmasa zet a, second leg-ah 2-1 in an tlawm ve thung. Si belhkhawmah 2-2-a an inhnehtawk vangin penalty shoot-out hmangin quarter-final lut tur chin fel a ni. Tie-break-ah hian mualneitu Inter Milan chuan 3-2 in hnehna an chang a, Real Madrid leh FC Barcelona te hnunung zuiin quarter-final an lut.
Mimuala tlawm tawh an nih vangin Atletico Madrid hian an mual Cívitas Metropolitano-ah chak ngei an mamawh a. Chak an mamawhna inkhelah goal chhuah hmasa zawkah tang mah se 2-1 in an khingpuite an lehthal thei hram. Italian club lian Inter Milan tan hian Federico Dimarco chuan minute 33-naah hmahruaina goal a thun. Atletico Madrid lakah goal an thun hmasak leh vangin quarter-final lut turin an dinhmun a tha leh zual sauh.
Goal an chhuah vangin Atletico Madrid hi dinhmun chhe takah tlu lut mah se an thochhuak thuai thung. Goal an chhuah atanga minute hnih hnu lekah Antoine Griezmann chuan goal thunin an si phurh a sut. Griezmann goal thun vangin Atletico Madrid an phur viau. Goal thun tuma an innawr tawn chhen hnuin hun tawp dawn hnaih minute 87-naah Memphis Depay chuan Atletico Madrid hmahruai letna goal a thun. Depay goal thun bak hi extratime-ah pawh goal dang a luh belh thei tawh lova, tie-break hmangin quarter-final lut tur chin fel zui a ni.
Penalty-ah hian Atletico Madrid tana pet hmasa Depay leh Inter Milan tana pet hmasa Hakan Calhanoglu te an thun ve ve laiin, a pahnihnaa pet Saúl Ñíguez leh Alexis Sánchez ten an thelh ve ve thung. Atletico Madrid tana pettu Rodrigo Riquelme leh Ángel Correa ten an thun ve ve laiin Inter Milan tana petchhuak pahnih; Davy Klaassen leh Lautaro Martínez ten an thelh a, Atletico Madrid hian 3-2 in hnehna an chang ta a ni.
Champions League quarter-final-a intum turte hi vawiin tlai hian pawh fel a ni dawn a. Atletico Madrid, Arsenal, Barcelona, Bayern Munich, Manchester City, Paris St-Germain, Real Madrid leh Borussia Dortmund te champion tumin an inel chhunzawm ang.