Aizawl district Electoral Officer (DEO), Bawrhsap ni bawk Nazuk Kumar chuan nimin khan Lok Sabha MP inthlanna neih turah mipuite hriat tur puangin chanchibu mite a kawm a, inthlanpui chu ngaipawimawh theuh turin mipuiin a chah.
Nazuk Kumar chuan, MLA inthlan a vote thlak an tam ang khan tun inthlanah pawh hian vote tla a that leh theih nana tran la turin mipui a sawm a, media mite pawh dik tak leh tluang taka inthlan a kal theih nan theihtawp chhuahin a ngen a, thil fel tawk lo awm ni an hriat reng reng chu hrilh hre zel turin a chah.
Aizawl DEO chuan, Aizawl district chhungah vote nei mipa 1,34,843, hmeichhia 1,53,480 leh service elector 1,735, an vaiin mi 2,90,058 an awm thu a sawi a, kum 18-19 inkar vote nei 10131 an awm thute, kum 85 chin chung lam voter 1493 an awm thute a sawi a, Aizawl District-ah polling station 321 a awm a, hmeichhe hlang vil tur polling station chu MLA bial tinah 4 zel, a vaiin 48 awm tura ruahman a nih thu leh vohbik hlang vil polling station 1 siam tum a nih thu a sawi.
Aizawl Bawrhsap in a tarlan danin, inthlannaah hian EVM ballot unit 514, control unit 523 leh VVPAT 541 hman a ni dawn a, chung khawlte chu endik hna thawh zawh tawh a ni a, district strong room-ah dah a ni tawh a ni.