Keini huna thawhtan zing lam khan Indian Wells mipa final khelh a ni a, champion lai Carlos Alcaraz chuan set hloh lovin Daniil Medvedev a hneh a, a champion nawn leh. ATP ranking thar berah Alcaraz hian No. 2 a luah chhunzaw, a, No. 1 ni mek Novak Djokovic a la lehpel thei rih lo.
Wimbledon 2023-ah a champion hnua beisei phak lo zui, champion harsat zui ta tlat Alcaraz hi champion a nihna hmun Indian Wells-ah a khel tha ta viau a, amaha tha ber a lanchhuahtir nawn leh. Final-a a khingpui Medvedev hi tunhnaia vawi hnih ngawt a hneh loh a ni a, tlawm nawn leh thei dinhmunah ding bawk mah se set a la zawn a, phu takin a champion.
Final ngaihven hlawh tak hi hmuhnawm takin an tan a, set khatnaah tie-break an khel nghal a, an inhnehtawk hle. Tie-break-ah Alcaraz a chungnung a, harsa takin set a la. Set la hmasa zawk a nih hnuin Spaniard hi inrintawkna sang zawk nen a inlan a, set hnihnaah a khel tha leh zual. Set hnihnaah hian Alcaraz a chungnung ta viau a, game khat chiah a hloh. Final ngaihven hlawh tak chu beisei phak lovin a tawp a, Alcaraz chuan a khingpui Medvedev chu 7-6 (7-5), 6-1 in a hneh a, a champion nawn leh.
Wimbledon-ah ropui taka a champion hnuin Alcaraz hian beisei a phak lo zui viau a, champion na nei lovin hun rei tak a awm. A champion theih loh vangin a boruak a hniam hman viau a, a elpui lian Jannik Sinner a khelh that bawk si vangin Alcaraz lakah rinhlelhna lian tak a awm. Indian Wells-ah a champion zo lo leh zel a nih chuan a boruak a hniam leh zual viau thei dawn. Inelna a hmachhawn hma hian champion a harsat vanga a lungngaih loh thu leh a champion leh thuai tur thu a lo sawi tawh a. A sawi ang ngeiin Indian Wells-ah phu takin a champion ta nge nge a ni. Indian Wells a champion nawn leh turin a elpui lian Sinner chu semi-final-ah hnehin, a chak kal tluang lai a tihtawpsak a. Final-ah US Open leh ATP Finals-a a hneh loh Medvedev a hneh zui leh bawk.
Indian Wells khelh zawh a nih rualin ATP ranking thar tihchhuah a ni a, inthlakthlenga lian thleng a awm lo. Point 9725 hmuin Novak Djokovic chu No. 1 a ni chhunzawm zel a. No 2 a awm chhunzawm Carlos Alcaraz hian point 8805 chauh niin, Djokovic a phak lohna hi point 920 chauh a ni. Ranking chhuak tharah hian Australian Open champion Jannik Sinner chu pathumnaah a awm a. Indian Wells final-ah Alcaraz laka tlawm Daniil Medvedev chuan point 7765 hmuin, palinaah a awm ve bawk.