Khumtung khuaa bekang an ei sual tak sample chu College of Veterinary Sciences, Selesih ah endik a ni dawn a, a result hi hriat theih vat beisei a ni.
Health department hnuaia Food and Drugs Administration Joint Director Lalsawma chuan Khumtung khuaa cheng mi tam takin an eisual bekang sample chu kar kalta khan la in, College of Veterinary Sciences, Selesih-ah endik tura thawn a ni tawh tih a sawi a, ni thum hnu velah chuan bekang dinhmun chu a hriat theih turah an beisei tih a sawi.
Lalsawma chuan Bekang ei sual hi a awm leh fo thin avangin Bekang um tute chu an fimkhura, bekang umna hmanrua te chu an tih fai that a ngai hle tih a sawi a, a hmuna hnah te tih fai uluk a ngai a, natna hrik fun tello turin thianghlimna kawngah an tan a ngai hle tih a sawi a, mipuite pawhin bekang an ei dawnin ei atan a him leh him lohte, an um dan a felfai em tihte hre thei se an duh thu a sawi.
Khumtung khuaa Bekang eisual kaihhnawih ni ngeia rin turin tunhnai khan Bekang eisual chhung zing ami naupang kum 1 leh thla 9 mi chu a boral a, he chhiatna thleng chanchin kim chang hre tur hian Food and Drugs Administration Joint Director Lalsawma chu nimin khan Khumtung khuaah hian a kal a, bekang ei sual a nih dan leh naute dam loh dan te uluk takin a zirchiang a ni.
Tarlan tawh thin angin, tun thla ni 9 khan Khumtung khuaah hian bekang eisual avangin mi 67 chu enkawl ngaiin an awm a, Damdawi in hrang hrangah awmin, an zinga mi tam zawk chu dam tawhin, mi 20 bawr vel erawh damdawiin ah la enkawl mek an ni.