Thawhtan zing khan NBA 2023-24 regular season khelh chhunzawm a ni a, Dallas Mavericks chuan champion lai Denver Nuggets lakah hnehna an chang. Inkhel dangah Miami Heat in an khingpui Detroit Pistons an hneh. Heat chakpuitu Duncan Robinson chuan NBA record thar a siam.
Western Conference-ah pasarihna ni mek Dallas Mavericks leh Wester conference-a pahnihna Denver Nuggets te hi an inhnehtawk viau a, overtime khelh a ngai teuh hle. Inkhel tawp nan second 25 chauh a awm tawh laia Kyrie Irving point thawchhuah hmangin Mavericks in hnehna an chang thei hram chauh a. Champion lai Nuggets lakah hian point hnih chauhin an chungnung.
Denver Nuggets hian Mavericks lakah bul an tan tha a, quarter khatnaah point liin an chungnung. Quarter hnihnaah point khatin Mavericks an chungnung ve thung a, point thuma hmahruai chungin Nuggets in chawlhlawk an hmang.
Chawlhlawk hnu lamah Mavericks in bul an tha tha ve thung a, quarter thumnaah point 8 ngawtin an chungnung a, point 7 a hmahruai chungin quarter hnuhnung ber an hmachhawn. Quarter hnuhnung berah inkhel a hmuhnawm viau a, an inlehthal tawn zak zak. Hun tawp dawn tep thlengin Nuggets in point thumin hma an la hruai a, an chak tlang teuh hle. Luka Doncic chuan point thum pawimawh tak vawm lutin a khingpuite an nihrual phawt a. Hun tawp nan second 25 chauh a awm tawh laiin Nugget hian point khatin hma an la hruai. Chak tura ngaih an nih hman laiin Mavericks player pawimawh Kyrie Irving chuan 20ft zet a sangah ball vawmin, point hnih vawm lut hlauh a, an khingpui te hi point 107-105 a lehthalin, hnehna pawimawh tak an chang.
Nuggets an hneh tum hian Mavericks player pawimawh Luka Doncic chuan point 37 a thawkchhuak a. An chakna point pawimawh tak thawkchhuaktu Kyrie Irving chuan point 24 a thawkchhuak ve bawk.
Inkhel dangah Miami Heat leh an khingpui Detroit Pistons te an inhnehtawk viau bawk a, inkhel hmuhnawm takah point 104-101 in Heat in hnehna an chang thei hram.
Miami Heat leh Detroit Pistons te hi an inhnehtawk viau a, hun tawp dawn tep thlengin point 101 ve ve hmuin an inhnehtawk mek. Hun pangngaiah an inhnehtawk tura ngaih a nih hman laiin Bam Adebayo chuan Heat tan point thum pawimawh zet mai a vawm lut a. He point thum hmang hian hnehna an chang zui ta a ni.
Pistons laka Heat chakpuitu Bam Adebayo hian NBA game 343 a khelh atangin point thum vawi 1000 zet a vawm lut a. NBA-ah vawi 1000 zet point thum vawm lut tling rang ber a ni a. Buddy Hield record khumin NBA-a three points vawi 1000 vawm lut rang ber record thar a siam.
Thawhtanni zinga inkhel dangah Milwaukee Bucks chuan point 140-129 in Phoenix Suns an hneh a. Boston Celtics chuan point 130-104 in Washington Wizards an hneh ve bawk.