Bundesliga kawtkaia Bayern Munich rorelna thiat theih hnaivai ber Bayer 04 Leverkusen chu season boruak tan chhoh hun lai thlen hnu pawhin an talbuai mai mai duh lo a, Pathianni zanah point thum thawkchhuak leh chungin table-a an hmahruaina an sawhnghet a, point 10-in champion lai Bayern nen an inthlau ta.
SC Freiburg muala 3-2 hnehna kha a zawna league away game-a Lerverkusen vawiruk chakna ni tawhin, Bundesliga title an hnaih zel.
Florian Wirtz chuan minute hnihna lekah Leverkusen hmahruaina goal khungin, minute 10-ah Ritsu Doan chuan mualneitu team siphurh a sut ve leh mai bawk a.
Chawlhlawk dawnah Adam Hlozek chuan mikhual hmahruai nawnna khungin, second half tir lamah Patrik Schick chuan Leverkusen tan a thun belh a; minute 80 khelh tlin dawnah Yannik Keitel chuan Freiburg beiseina tinungin an siphurh sut then bawk mah se chu bak away team lamin goal dang an chhuah belh duh lo a, Xabi Alonso team-in an hmahruaina an sawhnghet sauh a, pakuanaah Freiburg an thu chhunzawm thung.
Inrinni khan 5-2-a table mawngphah luahtu Darmstadt sawp chungin season hnuhnung vawi 11 tehrenga champion zawn thei Bayern Munich chuan an chung chiaha hmahruaitu Leverkusen nena an inkar chu point sarihah an pawtzim hman a, Pathianni zan Europa Park Stadion-ah hnehna changin Alonso leh a naute hian Bayern an kalsan hla leh hret a ni.
Bayer 04 Leverkusen hi 2023-24 season inelna hrang hrangah an la tlawm lo tluang zel a, an club chanchina league title hmasaber an beisei mekna kawngah game riat chiah khelh tur an nei tawh.