March 17, Pathianni zan khan FA Cup quarter-final khelh zawh a ni a, Manchester United leh Chelsea ten hnehna changin, semi-final an lut ve leh. Manchester United hian inkhel hmuhnawm takah an hmelma lian Liverpool chu 4-3 in an lehthal a, FA Cup atangin an petchhuak.
- Old Trafford-ah inkhel hmuhnawm
English club zinga inhal ber, chungnun inchuh reng renga hmanhlel Manchester United leh Liverpool te chu semi-final luh inchuhin Old Trafford-ah an inhmachhawn. Team ropui pahnihte hian Old Trafford-ah inkhel hmuhnawm an lantir a, an inlehthal tawn zak zak. Goal sarih zet luhna inkhel hmuhnawm takah Red Devils in Reds an hneh a, semi-final an inhlangkai.
Old Trafford-a inkhel hmuhnawm takah mualneitu United in bul an tan tha a, goal an thun thuai. Inkhel tan atanga minute 10-na lekah Scott McTominay chuan hmahruaina goal a thun. Hma takah goal an thun vangin Erik ten Hag-a team te an phur a, inrintawkna sang zawk nen an mualah an inlan. Hma takah goal thun mah se United hian hnufual zawk chungin chawlhlawk an hmang tlat thung.
Season kal meka inelna hrang hranga khel tha, inelna lian pali-ah champion beisei ngam hial Liverpool hian ngam takin an elpui lian United an nawr let a, chawlhlawk hmain goal hnih an thun. Minute 44-naah Alexis Mac Allister chuan Darwin Nunez siamsak atangin goal a thun a, an si phurh a sut. An si phurh an sut hnu lawkah Liverpool in goal dang an thun belh leh nghal Chawlhlawk dawn hnaih minute 45+2-ah Mohamed Salah chuan hnaite atatatangin an hmahruai letna goal a thun a. 2-1 a hmahruai chungin chawlhlawk an hmang.
Chawlhlawk hnu lamah inkhel a hmuhnawm zui viau a, goal li ngawt hmuh tur a awm zui leh. Team hnihten an hun tha an hlah ve ve hnuin hun tawp dawn hnaiah United an che fuh. Bench atanga lut Antony chuan box chhunga buai nuaih nuaiah karah fuh zetin a pet goal a, minute 87-naah an si phurh a sut.
An si phurh an sut vangin Red Devils an phur zui viau a, an chak zui teuh hle bawk. Hun pek belh tawp dawn tepah United hian an nawr let thut a, goal thun theihna hun tha an nei. Marcus Rashford chuan United chakpui theihna hun tha zet mai a neih chu hlahin, goal chhungah a let lut thei lova, uiawm taka hun hlu khawhral in, hun pangngaiah chak zawk an awm thei lo phawt a. Minute 30 dang an khelh zui leh a ngaih phah.
Hun pangngaiah uiawm taka an chak zawh loh hnuin extratime ah Liverpool in bul an tan tha a, goal thun hmasa zawkah an tang nawn leh. Harvey Elliott pet kawh tak chu United defender ten an dang pial a, si nghak Onana dan rual lohin a goal-ah a lut a. Reds in minute 105-naah hmahruai nawn lehna goal an thun.
Hnufual zawkah tan nawn leh mah se United an hnual lova, an zam hek lo. Chak ngei tumin an khingpuite an nawr let a, an mikhualte an nawr buai thei viau. Goal thun belh aia an goal ven him tum Liverpool an chesual a, hun tawp dawn hnaihah goal hnih an chhuah. United hian na taka an nawr rah an seng a, Nunez tihsual hremin goal an thun. Fuh taka an nawr tlang hnuin uiawm taka hun tha hloh thin Rashford chuan minute 112-naah dan rual lohin a pet goal ta nge nge a, an si phurh a sut.
Goal thum ve ve an thun hnuin Liverpool game a kang leh hret a, goal thun tumin an khingpuite an nawr bet. An khingpuite an nawr bet an tuar a, goal an chhuah phah thung. Hun tawp tep a, penalty shoot out hmangin chak zawk tur zawn a ngai ngei tura ngaih a nih laiin Harvey Elliott a chesual a, ho takin ball a hloh. Ball an chan ve leh United in fuh zetin an nawr tlang nghal zawk a. Amad chuan minute 120’+1-ah an chakna goal a thun. Amad hian a kawr a phel vangin red card a hmu zui thung. Tam zawk ni mah se Liverpool in an si phurh an sut thei tawh lova, United lakah uiawm taka tlawmin, trophy lian pali lak an tumna a tham ral.
Liverpool hnawtchhuaktu Manchester United hian semi-final-ah Coventry City an hmachhawn zui leh dawn a, Final luh theihna hun tha tak an nei. Semi-final lehlamah Manchester City leh Chelsea an intum ve thung dawn a. FA Cup final-ah United leh City te intawn theihna hun remchang an nei mek. Final ah United leh City an intum a nih ngat a nih chuan final duhthusam a ni ngei ang.