Chief minister Lalduhoma’n Lok Sabha MP inthlan awm tura ZPM candidate chu Central sorkar hnuaia scheme tha tak tak hai chhuak thei turin an ring tawk tih a sawi a, an party chu central sorkar thlawp theitu leh dodal theitu party an nih thu a sawi.
He thu hi nimina ZPM party chhung inkhawm an hmannaah sawiin Duhoma chuan Lok Sabha MP inthlan awm tura candidate atana an ruat Pu Richard Vanlalhmangaiha chu Pi leh pu atanga renga ramhruaitu chhungkaw belh chian dawl tak an nih thute, english leh Hindi thiam tak, MP tha tak ni thei tura an beisei a nih thu sawiin, ram rawngbawlna kawngah pawh theih tawpa ke pen turin an ring tawk tih a sawi.
Chief minister chuan, ruling party mi ngei MP kan neih chuan Mizoram sawrkar nen pawh hmasawnna kawngah thawhho a nuamin thil tih a awlsam hle dawn tih a sawio, an candidate chu vote pe theuh turin mipui a sawm.
ZPM chu tualto Party an nih angin vanneihna bik an nei a, central sawrkarah zawm bik an neih loh avangin an kut phuar sak an ni ve dawn lo a, a thu a zira Central sawrkar thlawp thei tu leh dodal theitu party an ni tih Duhoma chuan sawiin, hei vang hian Central sawrkar pawhin a ngai pawimawha, vawiin thleng hian a thawhpui tha em em tih a sawi a ni.
Duhoma chuan sawrkar hmasa hnuaia contract hna thawh chungchang sawi bawkin, hna zawh hun tawh, la zawh loh tam tak a awm thute, hna thenkhat contract semsawm lutuk avanga hna chhe tak tak hmuh tur a awm nual thute a sawi a, heng hna thalo te pho chhuaka thuneitute beng a thlen theih nana thawhpui zel turin mipui leh NGO te a sawm.