Mizoramah helicopter tui (fuel) thunna hmun khatah chauh a awm avangin fuel thun turah a thlawh kualnaah kum khatah cheng vaibelchhe 3 chuang hloh a ni thin a, sorkar in sum tam tham tak a sen ral thin pumpelh turin hmalak a ni.
Adviser to Chief minister Technical Er H.Ginzalala leh Ministry of Civil Aviation leh Pawanhans hotute chu thawhtanni khan an inkawm a, helicoter Service-a sawrkar sum sen tam lutuk tihziaawm a nih theih dan turte an sawiho a, Ginzalala chuan Helicopter tui thunna chu Lengpui Airport ah chauh a awm thute, Malpui Helipad atanga Lengpui pannaah hun tam tak leh sum leh pai sen ral a tam thu a sawi.
Ginzalala chuan Mizoram Helicopter Service na atan kum khatah darkar 1100 pek an nih laiin fuel thun tura thlawh kualnaah kum khatah darkar 300 sen ral a nih thu a sawi a, sum leh pai ah pawh sorkarin Helicopter hman nan darkar khatah Rs 87105 a sen thute, heta tanga chhutin fuel thun tura a thlawh kualnaah hian kum khatah 3 nuai 34 sing 4 sang 8 leh 320(Rs.33448320) sen ral a nih thu a sawi.
He harsatna sukiang turin Helicopter refueling station chu Mualpuia dah turin Ministry of Civil aviation hotute a sawipui tawh tih leh Permit an dil chuan an lo remtihsak mai tur thu an lo hrilh tihte a sawi a, heng a hmalakna te hi chief Minister sawipui thuai a tum thute a sawi a ni.
Ministry of Civil Aviation leh Pawanhans hotute pawhin Adviser to Chief minister hmalakna chu tha an tih pui thute an sawi a, Mualpui Helipad-a refueling station dah a nih ngei theih nana a tul apianga hmalakpui an in huam thu an sawi bawk a ni.