Kar tawp khan Europe a league lian zual panga khelh chhunzawm a ni a, England lamah FA Cup quarter-final khelh a ni bawk. Kar tawp football hnuhma langsar kan thlir kual leh zuai zuai ang.
- FA Cup
Pathianni zan khan English club zinga inhal ber leh ineltawk ber Manchester United leh Liverpool te chu FA Cup quarter-final-ah an inhmachhawn. Old Trafford-a inkhel hmuhnawm tak, goal sarih ngawt luhna inkhelah United in 4-3 ihnehna an chang a, an hmelma lian Liverpool an hnawtchhuak. Red Devils hian Reds hi FA Cup atangin vawi 11 an hnawtchhuak tawh a, FA Cup atanga Liverpool hnawtchhuak ngun ber an ni. Liverpool hnehtu United hian a zawnin FA Cup semi-final an lut a, 2004-05 hnu lamah FA Cup semi-final an luh zawn vawi khatna a ni.
Liverpool laka United goal pawimawh tak thuntu Marcus Rashford khan team lian zingah Liverpool a ngam ber a, Reds a hmachhawn tawh vawi 17 atangin goal 7 a thun a. Leicester City lakah game 16 atangin goal 8 a thun tawh thung.
Liverpool player pawimawh Mohamed Salah chuan United lakah Liverpool goal hnihna a thun. Aigupta tlangval Salah hian Old Trafford-ah khelh nga chhung goal a thun zawn chiah a. Kum zabi 21-naah Old Trafford-a mikhual player zingah khelh nga chhung goal thun zawn awm chhun a ni. Salah hian United a hmachhawn tawh vawi 14 atangin goal 13 zet a thun a, Liverpool player zingah United laka goal thun thei ber a ni bawk.
Champion lai Manchester City chuan si hnih faiin Newcastle United an hneh a, a zawnin vawi ruk zet FA Cup semi-final an lut a. City hi FA Cup-ah a zawna vawi ruk semi-final lut thei hmasa ber an ni.
- Premier League
Inrinni zan khan Fulham chuan an mikhual Tottenham chu 3-0 in an hneh nawlh a, chak nei lova khelh kaw chhung an kaltluang a tawp a. Kum 1905 hnu lamah Tottenham laka an chak chian ber tum an tawng bawk. Fulham hian Spurs hi January 2, 1905 khan 5-0 ngawtin an lo hneh tawh.
- Spanish LaLiga
Inrinni zan khan Real Madrid chuan mikhual an nihna hmunah 4-2 in Osasuna an hneh. Osasuna laka an chak chiah hian manager Carlos Ancelotti chuan Real Madrid hi vawi 200 a chakpui tling chiah. Ancelotti hian manager zinga Real Madrid chakpui ngun ber Miguel Munoz record a nihrual a, record thar siam a ngei dawn niin a lang.
Real Madrid in Osasuna an hneh tum hian Vinícius Júnior chuan referee thutluknaah a lawm lo tih a lantir vangin yellow card a hmu. Referee thutlukna a pawmpui loh vangin Vinicius Junior hian season liam ta chhungin yellow card vawi 19 zet a hmu a. Referee hnial vanga yellow card hmu ngun ber a ni a, amah hnaih bertu aiin vawi thum ngawtin yellow card a hmu tak zawk nghe nghe..
Pathianni zan khan FC Barcelona chuan an elpui lian Atletico Madrid chu 3-0 ngawtin an hneh. Atletico Madrid an hneh tum hian Robert Lewandowski chuan goal a thun. Poland forward Lewandoski hian club leh ram tan inelna hrang hrangah goal 623 a thun tling chiah a. Dutchman Abe Lenstra goal thun zat tlukin, football history-ah goal thun tam 10-na chiah a ni.
Pathianni zan khan Almeria chuan 1-0 in Las Palmas an hneh nawlh a, season kal mekah a vawi khat nan hnehna an chang. Almeria hian a chhe lama record siam an pumpelh a, game 28 chhung chak nei zawn record lo siam tawh Serie A club Ancona leh Varese te record an nihrual. Palmas lakah hian chak zo lo se chuan a chhe zawngin record an siam dawn tihna a ni.
- Italian Serie A
Pathianni zan khan AC Milan chuan 3-1 in Hellas Verona an hneh. Milan hian Serie A-ah goal 5000 an thun tling chiah a, Juventus leh Inter Milan te hnung an zui.
- German Bundesliga
Pathianni zan khan table-a hmahruaitu Bayer Leverkusen chuan 3-2 in SC Freiburg an hneh. Xabi Alonso enkawl Leverkusen hian season kal meka inelna hrang hrangah tlawm nei lovin vawi 38 an kaltluang ta chiah. Leverkusen hian kum 60 hnu lamah season thara tlawm nei lo rei ber pahnihna Inter Milan record an tluk.
Bayer Leverkusen hian Bundesliga-ah vawi 22 hnehna changin club record an siam tawh a. Mimuala vawi ruk an chak zawn tawhin club record thar an siam tel bawk. Leverkusen hian 2013-14 season ah khelh 28 chhung tlawm lo zawn Bayern Munich record an um mek a, record thar siam an hnaih deuh deuh zel.
Bayern Munich forward Harry Kane chuan season kal mekah league goal 31 a thun tling der tawh. Kane hi Alan Shearer (1995-96) hnu lama English player zingah season khata league goal 30 chung lam thun leh thei hmasa ber a ni. Kane hian a club thar Bayern Munich tan Bundesliga-ah goal 31 a thun tling der tawh a, Uwe Seeler record khumin Bundesliga record thar a siam tawh a. Bundesliga-ah season khata goal thun hnem ber Robert Lewandowski record goal 41 khum tumin a um leh mek.
- French Ligue 1
PSG tan Kylian Mbappe a vul chhunzawm zel a, pathianni zan khan Montpellier lakah hattrick a siam. Mbappe hian Ligue 1-ah goal 188 a thun tling chiah a, Ligue 1 a Fleury di Nallo goal thun zat a khum a. Ligue 1-a goal thun tam zual pariatna a luah chiah a. Ligue 1 a goal thun hnem ber Delio Onnis goal thun zat 299 erawh khum turin goal a la mamawh belh tam viau thung.