Pachhunga University College-a computer hmunpui tur PUC Infotech Centre chu nimin khan Prof Vanlalchhawna, Finance Officer chuan a hawng.
PUC Infotech hawnna inkhawm tawite neihah hian Prof Vanlalchhawna chuan Pachhunga University College hi ram pum huap pawha college hming lang tham a nih avangin tuna higher education kalphung inher danglam mekin a phut ang a tha leh tura inpuahchah a, zirna in tha tak ni tura tanlak a ngaihthu a sawi a; hei hi PUC tan chuan Mizoram mipuite laka a mawhphurhna ni hiala a ngaih thu a sawi.
Prof H Lalthanzara, Principal chuan he PUC Infotech Centre atana hmalak dan hrang hrangte leh a dinhmun tlangpui a sawi a, hetiang centre din a nih theih nana MZU lamin sum leh paia tanpuina an pek avanga an lawmthu a sawi bawk.
PUC Infotech Centre-ah hian thil chi thum a awm ang a, GIS Lab, Language Lab leh Internet Resource Centre te a awm ang a, a vaiin computer 140 a awm dawn a ni. GIS Lab hi Geography, Geology leh Environmental Science ten an hman tur a ni a; Language Lab hi English zirlaite leh soft skill course hrang hranga zirlaite hman tangkai tur niin Internet Resource Centre chu zirlai zawng zawngin internet kaltlanga an mamawh lak nan an hmang thei dawn a ni. He infotech centre hi Computer Base Test (CBT) centre atana hman theih a ni nghal dawn a, online exam chi hrang hrang he centre atang hian a tih theih ang a, IT leh computer software lam training chi hrang hrangte pawh neih theih tura ruahman a ni. Tin, he centre hi commerce zirlaiten an hman tangkai tura ruahman a ni bawk.
He centre atan hian Rs 71,15,164 sen ral a ni a, PUC Academic Block V chungah awmin hmun 3600 sq ft a awh a ni.