Tunhnaia ruah sur avangin Kawnpui to Aizawl, Lungdai road-a Kawnpui ram chhung kawngpui chu kawng a diakin a nal hle a, hemi avang hian Lirthei 2 chu an chesual a, lirthei chetsual hlauhawma a awm avang hian Aizawl pan lirtheite chu Sairang kawngah kal tir an ni.
Kawngpui atanga thudawn danin Kawnpui dai, Sairang peng thlang kawng chhuk thla laiah hian BRTF-in side drain tur an laihna leivung chu kawng kamah an chhek a, heng leivung an chhek te hi Nilaini zan lama ruahsur chuan chiah diakin, kawng a ti nal hle a; Aizawl lam pan Maxi Cap pakhat leh 207 pakhat te chu an chetsual phah a ni.
Lungdai road hi lirthei tana tlan harsa khawp leh chetsual hlauhawma a nal avang hian awnpui Police te chuan Aizawl lam pan tur Lirtheite chu Sairang lamah an kal tir a, Aizawl lam atanga Kawnpui lam pan Lirthei chho zawnga kalte tan erawh a hlauhawm loh avangin an tlan thei tho a ni.
Hemi rual vek hian Kawnpui leh Buichali inkar National Highway kawngpui chhe nasa zual lai te chu PWD, Highway Division III chuan a siam that hna an thawk mek a, Sr EE Pu R Lalduhthlanga chuan Khamrang leh Buichali inkar kawng bikah engemaw chen chu a chhe nasa zual lai an siam tawh thute, tunhnai khan a khuar nasa zual thenkhat pawh an hnawh man thute, Mualkhang Rel Station panna peng bul vel erawh hmanrua leh hnathawktu a mamawh tam dawn avang te, hun a duh rei deuh dawn avangin hmun dang thawm that ngai lai te tih hmasak phawt a ni tih a sawi a; helai hmun tih loh chu Lirthei tana tlan harsa lutuk tur a awm tawh lo a ti bawk.