MNF Party in Lok Sabha inthlanna-a an candidate tur chu Rajya Sabha MP ni lai K Vanlalvena a ni tih nimin khan an puang.
MNF party candidate tur te hi nimina Hnam Runah inkhawmah an party president Zoramthanga puang a, an candidate chu Rajya Sabha MP ni lai, Mizoram mipui aiawhtu leh thil tha tam tak titu a nih thute, Paliament-a Mizo tana mi huaisen an chawngbawla a nih thu a sawi.
MNF President chuan NDA chungchang sawiin, NDA chu political party hrang hrang thutkhawmna mai a nih thute, an party chuan an thuthlung an kalsan ve ngai lo a, hnam himna nghawng thei thilah Central NDA Sorkar do zawngin an kal zel tih a sawi a, CAA, FMR, Assam leh Mizoram ramri leh Manipur unaute buainaah an dinna an la sawhsawn ngai lo a; NDA do na ngam ber chu MNF party a nih thu a sawi.
MNF MP candidate K Vanlalvena pawhin thu sawiin, inthlan campaign nan sum leh pai a nei lo a, pi leh pu atangin belhfakawm chhuan tur a nei lo tihte, mipuite khawngaih beiseiin Pathian leh kan ram tana a pen chhuak dawn tih a sawi a, rorelna inah thu sawi turin Hindi leh English thiam aiin rilru put hmang a pawimawh zawk tihte, Lok Sabha MP ah thlan tlin a nih chuan Mizo tawngin thu a la sawn dawn tih a sawi a, Mizoram mipuite vote pe turin a sawm a ni.
MNF party-in MP inthlana an candidate tura an ruat K Vanlalvena hi MZP General headquarters President lo ni tawh, MNF party-ah thalai president leh hruaitu chanvo pawimawh hrang hrang lo chelh tawh thin a ni a, kum 2020 June thlaa Mizoram aiawh tur Rajya Sabha MP thlan a nih khan thlan tlin a ni a, tunah MP ni mek a ni.