Thla thar ni 19-a Mizorama Lok Sabha MP inthlan lo awm tura ZPM candidate Richard Vanlalhmangaiha’n nimin khan inthlan chuh turin hming a pe lut a, state-a rorel lai candidate a nih angin a tlin ngei a beisei tih a sawi.
Richard Vanlalhmangaiha chuan nimin chawhma khan Returning Officer leh Aizawl DC Nazuk Kumar hnenah nomination hi a theh lut a, chief minister Lalduhoma leh ZPM president Lalliansawta te’n an tawiawm a ni.
Nomination paper a theh luh zawha thuthar thehdarhtute’n an kawmnaah Richard chuan a tllin ngei a in beisei thu sawiin,”Candidate dangte chu mi tha tak tak an nih avangin a huphurh a, chutihrual chuan nikum maiah Mizoramah sawrkar thar a piang a, mipuiin an duh ang tak an thlanchhuah ZPM Candidate ka nih avangin ka tlin ngei ka beisei,” a ti.
Richard-a chuan zoram than zelna turin theih tawpin ke a pen tur thu a sawi a, sorkar nena ke pen rual tur an ni a, Mizoram tan project lian leh sum tam tham tak hnuh luh chu a thil tum a nih thu a sawi.
Thlan tlin lo ni ta se a thutna tur chungchang zawhna chu chhangin,”Thlan tlin ka nih hnuah kan party high command in an ngaihtuah anga, khawi lamah nge ka thut anga, khawi lam nge ka vote ang tih chu party thu a ni ang,” a ti.