Goalkeeper Zoliansanga’n penalty vawihnih a dang a, Zirtawpni zan Mahindra XUV300 LPS Cup final-ah Sihphir Venghlunin 1-1-a an inhnehtawkpui hnuah penalty pet hmangin Kawnpui Joint an hneh.
Rajiv Gandhi Stadium, Mualpuiah mipui thahnem tak an pung khawm a, TV kaltlanga Mizoram mipuiin an thlir bawkna hnuai hun tawp dawnah Lalrintluanga’n Kawnpui Joint hmahruaina’n a pet lut a, minute 90 hnuah Lalmuanpuia’n Sihphir Venghlun chhanhimin an si phurh a sut hram.
Minute 30 hun pek belh an khelh chhungin goal dang a luh belh lo a, penalty pet hmanga a chak zawnnaah Divya Player of the Match Zoliansanga’n Kawnpui tana pen chhuak hmasa pahnih Lalkrossmawia leh C. Zomuanpuia pet a dansak ve ve.
Malsawmtluanga, Roneihsanga, Lalramluaha leh Ricky Lalramnghakate’n Sihphir Venghlun tan chhuihlut vekin 4-1-in an chak a, a vawikhatna’n khua leh veng inelna lianah an champion.
Sihphir Venghlunin an khaw football chanchina hun ropui thlentirin, fair play lawmman an dawng tel a, stadium chhungah mipui sang telin champion an lawm zui nghal a, nikum khan khua leh veng futsal inelna lianah an champion tawh bawk a ni.
Aizawl District Football Association buatsaih team 62 inelnaah hian final luh phu ve ve team pahnih inkarah Sihphir Venghlunin inkhel thunun hnem zawkin goal hlauhawm an siam chhuak tam zawk a, minute 35-ah Malsawmtluanga ball pek um falin Lalmuansanga’n goal chungah a pet chhuak.
Second half tirah Kawnpui tan Rintluanga’n goal a thawk chhuak teuh hle a, vei lam atanga a siam chu centre-back Lalruatsanga’n dang pialin goal kham a per a; a hnu lawkah JH Lianzuala’n hnai tak atangin Sihphir Venghlun tan hun tha bawhpelh ve lehin goal zawn loah a tauh chhuak.
Hun pangngai tawpna’n minute thum a la awm tihin Rintluanga’n Albert Zohmingmawia’n tha taka ball a pek luh a um fal a, Zoliansanga pet khumin nalh takin a khung a, Aizawl district pawn atanga sawm bik team pali zinga mi Kawnpuiin champion an hnaih hman hle.
Minute 90 hnu hun pek belh minute thumnaah Ricky-a’n corner pet Muanpuia’n a tauhlut a, Sihphir Venghlunin hlim takin goal an lawm.
Phurna sang zawk nen hun pekbelh minute 30 dang khel zui lehin, Lalmuana vanneih zan ni se thun ngei theihna remchang a nei.
Minute 103-ah Sihphir forward hian tha takin pet mah se Kawnpui goalkeeper chetha tak Lalhriatpuia’n a dansak a, a hnuah tournament best layer Joseph Lalthafela’n ding lam sir atanga a vawrhluh chu goal pawn chiahah a tauh chhuak bawk.
Kawnpui hmatawngte’n chet an harsat a, goal sarih thun tawh leh top scorer Mawitea’n hnuhma a nei thei lo a, tournament chhunga penalty pet an hmachhawn hmasak berah chhuihlut lo nghalin, Aizawl district pawn atanga champion hmasa ber nih an tumna a thamral zui ta a ni.