Hmarchhaka infiammite khawmpui lian ber North East Olympic Games (NEOG) 2024 chu a tiak ta a, Mizoram in NEOG-a Gold Medal a lak tam ber tum a tawng a. Gold Medal 17 nen a tawp a khar. Mizoram hian Major games tam zawk a thunun a, athletics lamah tan lak a ngai viau thung.
- Basketball-ah Mizoram champion nawn
Nagaland-a neih NEOG 2024-ah hian inrinni tlai khan Basketball mipa final khelh a ni a, inkhel hmuhnawm takah Mizoram in an khingpui Assam chu point 82-78 in an hneh a, an champion nawn leh.
Champion lai Mizoram hian Assam lakah bul an tan tha lova, inkhel tir lamah point 11 lai ten hnufual zawkah an tang hman. Huai takin an khingpuite an nawr let a, an inlehthal tawn zak zak. Rin phak bakin Assam an khel tha a, Mizoram an chhaih buai. An inlehthal tawn zak zak hnuin Mizoram hian point liin hnehna an chang thei hram a, NE Games-ah champion nawn lehin Gold Medal a la nawn leh.
- Football-ah vanduai
Mipa football final-ah Mizoram in Manipur laka an hmahruaina an humhim zo lova, 2-1 a tlawmin an champion zo lo.
Champion lai Mizoram hian Group stage-ah 4-0 ngawta an sawp tawh Manipur lakah bul an tan tha a, Isaak-a goal hmangin hma an hruai. Manipur hian an mualpho tawhna khuh mawi tumin theih tawp an chhuah a, Mizoram hneh let ngei an tum hle. Chawlhlawk hnu lamah na takin Mizoram an nawr a, Deny Singh leh Santhoi ten goal thunin an elpui lian Mizoram an lehthal a, football atangin Gold Medal an la. Manipur hi inelna pawimawh Santosh Trophy-a an sawp tawh Mizoram chu final-ah an hneh nawn leh ngat a. Inelna pawimawhah Mizoram an ngam hle.
- Team champion MWA
NEOG 2024 neih zawh takah Gold Medal pali, Silver Medal 2, Bronze medal 7 Mizoram Wrestling Association chu Mizoram aiawha fehchhuak zingah Gold Medal la hnem ber an ni a, Mizoram team champion an ni.
NEOG 2024-ah hian wrestling chihnih; free style leh Belt Wrestling hmangin inelna neih a ni a. Free Style Wrestling atangin B.Lalawmpuia leh Remruatpuia ten Gold Medal an la a. Belt Wrestling atangin Elizabeth Lalhlupuii leh Penticos Lawmsangpuii ten Gold Medal an la bawk.
Mizoram aiaawha fehchhuak zingah Boxing team in Gold Medal 3, Silver 3 leh Bronze 7 lain wrestling tih lova Mizoramin Gold Medal a lak tamna a ni a. Taekwondo team in Gold Medal 3, Silver 4 leh Bronze medal 2 an la bawk.
- Mizoram in Medal 59 la
3rd NE Olympic Games hi Mizoram in Gold Medal a lak tam ber tum a ni a, Gold Medal 17 a la tling. Gold Medal 17 latu Mizoram hian Silver Medal 15 leh Bronz Medal 27 a la tling a, a pumpuiah medal 59 a la tling. NE Games hmasa ber, Manipur-a neih ttm khan Mizoram hian Gold Medal 8 a la. NEOG 2022 – Meghalaya-a inelna neih tumah Gold Medal 16 an la bawk. Inrinni zana khar tak NEOG 2024 ah Mizoram hian Gold Medal 17 a la tling a, North East Games neih tawh zawng zawnga Gold Medal a lak tam ber tum a ni.
A pumpuiah palina ni phak Mizoram hian Major Games a thunun hneh thawhkhat a, Basketball leh Volleyball ah a champion a. Football final-ah erawh uiawm takin an tlawm thung. Major Games-ah chetha viau mah ila Athletics lamah kan la hniam viau thung a, hei hi state dangte lakah min pawt hniamtu langsar tak a ni.
- Manipur bawk
NEOG 2024-ah a thlengtu Nagaland chetha viau mah se Manipur ropuina an dal thei chuang lova, Manipur bawk an champion nawn leh. Manipur hian Gold Medal 52 zet a la a. Silver 38 leh Bronze 40 zet lain, medal 130 zet a la tling.
Tarlan tawh angin inelna thlengtu Nagaland an chetha viau a, a pumpuiah medal 134 zet an la tling. Nagaland hian Gold Medal 48 an la a, Gold Medal paliin champion Manipur an phak lo. Pathumnaah Gold Medal 44 latu Assam an awm ve bawk. Mizoram in palina an luah a, NEOG 2022-ah Gold Medal 16 la chunga parukna ni Mizoramin hma a sawn hret a. Hmasawnna tur erawh a la tam hle.