Keini huna thawhtan zing lam khan AT&T Stadium, Taxas, USA-ah Concacaf Nations League final khelh a ni a. USA chuan si hnihin Mexico an hneh a, a zawna a vawi thum nan an champion. Si khat faia Panama hnehtu Jamaica chu pathumna an ni ve bawk.
Final hmuhnawm takah USA leh Mexico ten inkhel hmuhnawm an lantir a, vannei zawkah USA an tang a ni ber. Chawlhlawk hmain goal a lut dawn lo emaw tih hnuin minute 45-naah Tyler Adams chuan kawh mar tha zetin a pet goal a, hmahruaina goal a thun. Adams goal thun hmang hian si khat faia hmahruai chungin USA in chawlhlawk an hmang.
Chawlhlawk hnu lamah USA an khel tha chhunzawm a, goal pawh an thun belh leh thuai. Minute 63-naah Mexico tlarhnungin ball a then fai theih loh chu Giovanni Reyna chuan goal kilah fuh zetin a pet goal a, an hmahruaina a tizau. Mexico hian an si phurh sut ngei tumin tan an khawh a, referee in penalty pe hman zet mah se VAR rawn hnuin sut a ni a, tlarhnung inrem phui tak USA lakah goal thunna hun tha an nei hleithei meuh lo. USA hian hun tawp dawn tepah goal an thun belh teuh hle a, uiawm takin an hun tha an hlah ve bawk. Hun tawp thlengin goal dang a luh belh thei lova, USA chu an champion nawn leh ta a ni.
Inelna neih zawh taka khel tha tluang tak, final-a goal khat thuntu Giovanni Reyna chu best player-ah thlan a ni. Borussia Dortmund atanga Nottingham Forrest-ah loan a khel mek Reyna hian USA tan vawi 26 khelin, goal 8 a thun tling tawh.
Final khelh a nih hma hian AT&T Stadium-ah tho hian Jamaica leh Panama ten pathumna an inchuh a, Dexter Lembikisa goal thun hmangin Jamaica in hnehna an chang a, pathumna an ni.