- Dr. C. Lalrampana
A KAMKEUNA
Bekang hi a scientific hming chu ‘Glycine max’ tih a ni a, saptawng chuan soy bean tih niin Asia khawchhak lam atanga lo irh chhuak a ni. Kum 2015-2019 chhung khan USA khu khawvela bekang thar chhuak hnem ber a ni thin. Kum 2018/2019 khan 120.52 million metric tons a thar a;
Nikum May 2020 khan Brazil-in USA hi khumin 126 million metric tons a thar a ni. Nikum 2020 khan India hian ram 120 lakh hectares atangin 105 lakh tonne a thar ve a, India ramah chuan Maharashtra & Madhya Pradesh hi bekang thar tam berte niin India ram puma thar chhuah zawng zawng zaa 89% hi heng state 2-te thar chhuah hi a tling hial a ni. Mizote hian bekang kan hmel hriatna a rei tawh hle a, engtik kum atanga ching tan nge kan nih chiah erawh hriat a harsa hle.
A TANGKAINA
Bekang hian hriak a ngah êm êm a, be lam chiah chuan hrisel nan a thain a tangkai hle. Bekang hi chaw tha tak a ni. Bekang hum chhum hmin 100grams-ah hian Calories – 173, Fiber – 6 grams Carbohydrates – 9.9 grams, Protein – 16.6 grams, Fat – 9 grams infinkhawm a awm nia chhut theih a ni. Hetiang a nih avang hian kan nu cancer vei tirh khan bekang hum chhum a tak leh a tui ka eitir thin a, chemotherapy avanga a chauh zawi hle lai pawhin a chhawk zangkhai hle thin. Tin, bekang hi mut theih nan te, zunthlum leh thisen kal siam that nan te, naupai chak lo tan te, ruh hrisel nan te, chaw pai tawih nan te,
Lung hrisel nan te, cancer vengtu atante leh rih zawng thunun nante a tangkai hle.
EI DAN CHIHRANG
Bekang hi chawhmeh tui tak, chawtha tak a ni a, chuvangin, a siam dan leh ei dan chihrang hrang a awm thei. A hnah chhum, bai, kan leh tlak te, a hum chhum hmin leh a hriak, her dip, a bawnghnute, a chhang, toffy leh a tui (juice) leh um uiha ei thinte a ni.
Ei SUAL CHHAN
Hnam fing zawk leh changkang zawkte chuan bekang hi a bawnghnute, toffy, a hriak, a chhang, a diptea siamin an ei thin. Mizote hian ei dan tur dik lova kan ei thin avangin bekang ei sual a tam thin niin a lang. Vitamin leh a chakna (potential) awm lo thei ang berin a hum chhum hminah vut duk phulin chihriin rapah kan rep uih hnãng thlurh mai a, maimawm rilzam ang duaha um fuh tum phei chuan nilenga chawbel nen thut chilha ei mial mial a chakawm thei hle.
Ei mi ni awm pawha a lan loh laiin, han ei chuan a tui êm êm a; multivitamin chawplehchilha chaw ei titui theitu a nih avangin mi lian intichangkang leh nula hmeltha leh inla sial viau pawh Zohnahthlak rim nam chin tawh phawt chuan an ei lo phal tak tak meuh lo niin a lang. Mizote bekang ei dan ber kher hi hriselna atan a that loh hmel rualin a umtute hian a thawh hmana calcium carbide powder an phul thin nge? a hum zuartute’n rannung tur hlo Insecticides, Herbicides, Rodenticides, Bactericides, Fungicides
Larvicides etc. a engemaw ber an telh thin zawk em niang, kumtin deuhcthaw bekang um ei sual sawi tur an awm deuh ziah thin.
Hetiang a nih avang hian June 24, 2014 (4:00pm) pawh khan Principal Director, Health & Family Welfare Department Office Chamber-ah Health Department Programme hrang hrang Officer-te an thukhawm a. Mizoram hmun hrang hranga Bekang eisual avanga harsatna thleng thinte sawiho a ni a. Hemi kaihhnawiha mipui zirtir dan turte pawh sawiho nghal a ni. Kha hun kha Dr. K.Ropari, Principal Director, HFW in kaihruaiin Dr. Pachuau Lalmalsawma, Nodal Officer, Integrated Disease Surveillance Programme (IDSP) hnen atangin report ngaihthlak a ni a, Pu Lalsawma Pachuau, Jt. Director, Food & Drugs Administration chuan Bekang a him loh thin nachhan leh a inven dan turte a sawi bawk. Dr.Pachuau Lalmalsawma, State Nodal Officer, IDSP chuan Bekang eisual avanga nunna channa hmun Bungtlang pawh a hova tlawh a nih thu leh a tul anga hmalak a nih dan te a tarlang a. Health Department chuan thuchhuah siamin Bekang hi khawi ami nge, ei atan a him tawk em, dah thatna a rei tawh em, tih leh a um dan a felfai tawk em tihte hre chiang lo va ei mai mai lo turin mipuite an chah a ni tih kha kan la hre reng awm e.
International Journal of Advanced Research and Development; ISSN: 2455-4030, Impact Factor: RJIF 5.24; Volume 1; Issue 12; December 2016; Page No. 29-41-in a tarlan danin bekang ei sual avanga harsatna awm thinte market survey an neih atanga an hmuhchhuah danin bekang humah hian ei leh in tur vawn that nana hman phal loh sorbic acid, benzoic acid dehydroacetic acid (DHAA) & hydrogen peroxide (HPO) an telh ruk thin vang niin an sawi. Tunhnai a Khumtung khua mi 67 ten Bekang an eisual leh nausen pakhat thih phah chu enfiah a nih hnuah Khawsikpui (typhoid) thlen theitu natna hrik ‘Salmonella Typhi’ hmuhchhuah a nih thu puan a ni.
Health and Family Welfare Department-a Food & Drugs Administration Joint Director Lalsawma sawi danin mithiamte chu Khumtung-ah kalin an Bekang eisual sample chu lain Selesih-a College of Veterinary Science and Animal Husbandry-a Laboratory-ah endik a ni a. Laboratory-a endikna-ah hian Bekang umah hian Salmonella Typhi natna hrik hi hmuhchhuah a ni. Mithiamte chuan “Salmonella Typhi hi khawsikpui thlen theitu Bacteria a ni tih sawiin, tui emaw eitur emaw tih bawlh-hlawh leh thianghlim tawk lovah a darh thei a. Mihring in a lem hnu-ah lo puangin thisen kalkawng ah a taidarh ta thin a ni. “ an ti. Hetiang tho hi phai atanga bekang hum kan chawk luh thinah hian a tel thin a nih ngei a rinawm.
A TLANGKAWMNA
Bekang ei sual thin avanga thihna awm thin kan pumpelh theihna tha ber chu bekang hi um uih kher lovin ei tawh thin ila tin, phai atanga lakluh ngai lovin intodelh ila, tual chhunga thar chhuah çhauh, damdawi hmanga sawngbawl dang lam loh siam dan chihrang hranga siama ei hi bekang ei sual awm lova ei dan dik leh hriselna chu a ni ngei añg. Mahse, bekang um bansan chu thil chin than, thlah harsa a ni ang. Bekang um nghei hmak tura han suangtuah chhin pawhin nghei dawn ai chuan vanram kai loh mai pawh a thlanawm rum rum zawk awm e. Bekang um bansan chi a nih tawh si loh avangin Mizoram pawn atanga bekang hum lakluh reng reng chu Food & Drugs Administration, Health Department-in Selesih-a College of Veterinary Science and Animal Husbandry-a Laboratory-ah Test a neih hnuah finfiahna paltlang chin chauh bazarah zawrh thin ni se, bekang eisual avanga harsatna kan tawh thin hi a kiang ngei ang. Hei aia tha lehzual zawk chu bekang hi ramdang emaw, hmun dang atanga lakluh (import) ngai miah lo tura intodelh hi a ni. Hetiang taka kan beiha kan tanrual theih chun bekang ei sual avanga kan buai thinna hi sutkianin a aawm ngei ang. Mizote hian Bekang hi kan ei sual thin tihna ni lovin, bekang tur telh, bekang thianghlim lo kan ei fuh thin a, chu chu bekang ei sual tiin kan sawi zawk hlauh ta thin a ni. Nu pakhat chuan “Keima bekang thar ngei pawh ka ei sual tho” a ti ve tlat. A dangleh chuan-”Sa chhumna bela bekang chhum hi ei sual ngei ngeina a ni” a ti ve bawk. Engpawhnise, Bekanga intodelh leh thianghlim taka sawngbâwl thin hi himna bulpui ber chu a ni ngei ang.