Khumtung khuaa cheng mi 60 chuangin an eisual bengkang umah natna hrik ‘Salmonella Typhi’ a awm tih hmuh chhuah a ni a, he natna hrik hi khawsikpui (typhoid) thlen theitu a ni.
Khumtung khuaa chengte eisual Bekang sample hi Selesih a College of Veterinary Science and Animal Husbandry-a laboratory-ah endik a ni a, tunhnai khan result hi a chhuak.
Food and Drugs Administration Joint Director Lalsawma chuan Bekang umah hian Salmonella Typhi natna hrik hmuh chhuah a nih thu a sawi a, he natna hrik hi khawsikpui thlen theitu bacteria a ni a, tui emaw eitur tihbawlhhlawh leh thianghlim tawk lovah a darh thei tihte, mihring taksaa a luh hnuah thisen kalkawngah a taidarh ta thin tih a sawi.
Lalsawma chuan, bekang uma natna hrik a awm chhan chu, bekang sawngbawl tute kut fai tawk loh vang emaw an hmanrua hmante a fai tawk lo vang a ni thei tih a sawi a, Bekang umah hian hetiang ang natna hrik hi um tel theih a nih avangin fimkhur a ngai hle a, bekang um thinte pawh ei leh in an sawngbawlnaah thiang hlim takin ti thin se an duh thu an sawi.
Tarlan tak thin angin, UPC Mizoram kohhran hmeichhe pawlin March ni 9-a Bekang um an zawrh chu mi 67 laiin an ei sual a, damdawiin hrang hrangah te dah an ni a, an zinga mi hmeichhe naupang kum kum 1 leh thla kaw mi Lalthansangi chu March ni 15 zan khan a boral a ni, tunah hian bekang eisual zinga a tam zawk chu an dam tawh a, mi 2 erawh State Referral Hospital, Falkawn ah la enkawl mek an ni.