Nimin khan Central YMA Committee Room ah Central YMA hruaitute leh Mizorama Kohhran hrang hranga Thalai pawl hruaitute Ruihhlo leh a kaihhnawih chungchangah an inkawm a. Inkawmhona hi Lalhmachhuana, President, Central YMA in a kaihruai.
Prof. Malsawmliana, General Secretary, CYMA in sawi hawnna hun hmangin Ruihhlo leh a kaihhnawih chungchanga YMA hmalakna leh tun dinhmuna ruihhlo in bu a khuar dan te, thalaite dinhmun leh thalai pawl ten hma kan lak theih dan turte a sawi a. Hemi zawhah hian sawihona hun hman a ni.
Ruihhlo leh a kaihnawih a chungchanga Kohhran thalai pawl hrang hrangte nen nih sawiho a nih hnu hian Meeting chuan Ruihhlo do turin Central YMA kaihhruaia Coordination Committee din ni se, member atan Kohhran thalai pawl tin aiawh 2(pahin) theuh ruat an remti a. He Coordination Committee hian Harm Reduction leh Supply Reduction lamah theihtawp chhuahin hma a la thin ang.
Inkawmhonaah hian Kohhran thalai pawl hrang hrang – CKTP, Aizawl Area TKP Coordination, General PYD (Mizoram UPC), SDA Youth Federation, Territorial Salvation Army Youth, LIKBKTP, Aizawl Diocese Thalai Pawl, ECM Thalai Pawl atangin hruaitu 36 an kal a, Central YMA atangin 20 vel an tel bawk.