Nimin khan MNF President Zoramthanga chuan Parliament (18th Lok Sabha) inthlanpui lo awm tur atan MP Election Campaign-in Saitual a tlawh.
Zoramthanga chuan NDA chungchang tarlangin MNF hi NDA in hnawk a ti em em a. A chhan chu Mizoram tan hnawk tur chu kan do vang a ni. Assam nena kan ramri buaiah Home Minister Amit Shah an in inhnukdawk tur a ni min ti a, “Ka inhnukdawk dawn anih chuan ka Chief Minister nihna ka inhnuhdawh hmasak a ngai,” tiin ka chhang a. A ngawi hlen ta a, MNF min thunun lohzia a lang. CAB kan dodal a, Mizoram an rawn telh ta lo. Tin, UCC a rawn ti leh a, kan duh lo. Mizoram Assembly House-ah kan lo paih thla leh ta tawp mai anih kha. Chutah kan Unau Burma raltlante kan thawnlet dawn loh thu House-ah kan pass a, raltlan ṭanpuina tur kan dil a. Cheng Vbc 3 bak min pe chhunzawm ta lo. Free Movement Regime kan do a, Chawlhni a Vote chhiar kan do hlawhtling bawk a ni, a ti.
Chutihlaiin Mizoram CM Lalduhoma chuan NDA-a tel turin MLA inthlan hma khan Assam CM a lo be daih tawh a. MLA inthlanah pawh sum an rawn ngah tak thut kha! BJP lakah an lo zuk inhralh daih tawh zawk. ZPM hian NDA atangin MNF chhuak se, Central-a tlaktlum nana NDA zawm an duh a. Amaherawhchu, MNF angin NDA an do ngam dawn lo tih chu Burma ramri hung chungchangah pawh an zuzi chiang hle. ZPM hian NDA nupui nih an duh laiin an thei lo a, hmei nih an tum hram hram avangin MNF leh BJP an thawk ho tiin min bei thin zawk a ni. MNF hi a chhung atanga Mizo hnam tana NDA do nasa ber kan ni, a ti.
Kan hma lawkah MP kan thlang dawn a. Mizoram aiawh tur atan a Politics, Party, Legislator bakah Election Candidate-ah experienced nei miah lo Delhi-a tirh thlak chu Mizoram tan chuan a thlaphanthlakin mipui tan thlan chi a ni lo. MNF MP Candidate K.Vanlalvena chu fak hranpa a ngai loin a ṭhatna kan hmu tawh. Mi huaisen a ni a, Assam ramri chungchangah pawh ‘We shall kill them all’ tia Mizo mipuite thlavang hauh ngam a ni. Zoram mipuiten kan ngaihtuah tur chu tunge Parliament-ah Mizoram humhalh nan huaisen tak a au leh experienced nei tha tih kan ngaihtuah a ṭul, a ti a. Chuvangin, Mizoram tana Mipui MP Candidate K.Vanlalvena vote turin Zoram mipuite a sawm nghal bawk a ni, a ti.
MNF President MP Election Campaign hi Dr.Z.R.Thiamsanga, Adviser, Self Daniala-Secy MNF Gen.Hqrts, Dr.C.Zothanmawia,Jt.Secy MNF Gen.Hqrts ten an ṭawiawm a ni.