Thawhlehzana Belgium an hmachhawn tuma England captain Declan Rice chuan Ben White chu a rilru thlaka England tan khel leh turin a duh a. Ram tan khel leh tura hmin theih a inbeisei.
England tan vawi li khel tawh Ben White hi World Cup 2022-ah khan England Squad-ah a tel a, Qatar-ah hruai tel a ni. Qatar-ah hian awm tluan lovin England camp a chhuahsan thung a, hei hi assistant coach Steve Holland nen an inhmuh thiam loh vanga nia ngaih a ni. Hemi hnu hian ram tan a inlan leh tawh ngai lo va, koh tumna a awm pawhin amah zawkin ram tan khelh a duh rih lo zawk niin tarlan a ni.
Ram tan a khelh loh chhungin White hian Arsenal tan a khel tha thei hle a, Gunners player pawimawh a ni. Arsenal tan a khelh that theih em vangin England tan khel tura ko turin manager Gareth Southgate pawhin nawrna na tak a dawng. Southgate hian koh hreh lo viau mah se White zawk hian be hmasa in, ram tan khel leh tura a la inpeih loh thu a hrilh nii Southgate hian a sawi.
Ram tan kir duh lova nuar mek Ben White hi Arsenal tana a khelhpui, England tan vawi 50 khel tling tawh a, captain ban hren pawh lo hreng ve tawh ngat Declan Rice chuan Arsenal-a a kir leh hunah White hi England tan khel leh tura hmin a tum thu a sawi a. Inpawh taka inkawm in, a rilru a thlaksak theih a beisei thu Arsenal leh England player pawimawh Rice hian a sawi.
“Ka beisei a lawm, a theihna sang tak hian ram tan khel turin a hruai kir leh ang a, ram tan a inlan leh ang. England tana khelh hi chawimawina a ni a. Ben hi pa tha tak mai a ni a, club leh ram tan a theihna zawng zawng hlan thin mi a ni. England tana khelh hi a phu a, a phu ang ngeiin Three Lions tan a inlan leh ngei ang”, a ti.