April 19-a Lok Sabha MP inthlanna lo awm tura chuh tura hming pek luh hun chu nimin tlai khan a tawp a, hriat theih chinah mi parukin inthlan chuh turin returning officer hnenah nomination an theh lut.
Nimin hming pek luh theih tawp niah khan MNF official candidate K. Vanlalvena, Congress candidate Lalbiakzama leh BJP candidate Vanlalhmuaka ten Returning Officer leh Aizawl DC Nazuk Kumar hnenah nomination paper an theh lut a, hemi hma hian ZPM candidate Richard Vanlalhmangaiha, PC party candidate Rita Malsawmi leh independent-a ding tur, Lalhriatrenga Chhangte te chuan hming an pe lut tawh a ni.
Nimina nomination a thehluh zawha chanchinbu miten an kawmnaah MNF candidate K Vanlalvena chuan a khingpuite chu parlianment house-a la chetla ngai lo an nih thu leh amah erawh kum thum chuang ram leh hnam tana parliament chhung leh pawna lo au tawh a ni a, chu chu mipuiin an hriat avangin an thlan ngei a beisei thu a sawi a, NDA lama a thut tur thu chungchang a sawi chian avangin mipui vote-ah nghawng a neih a rin loh thu sawiin, BJP thil tha lo tih chu NDA chhung atangin do a sawt zawk tih sawi.
Congress candidate Lalbiakzama pawhin zawhna chhangin an party dinna chu sakhaw zalenna leh intluktlanna rama India ram siam leh a ni a, chumi duhtute chuan an vote ngei a ring a, a tlin theih ngei an beisei hle tih a sawi a, MP-ah thlan tlin a nih a, INDIA block an sorkar chuan BJP-in hnam leh sakhaw tlem zawkte tana dan tha lo a lo pawm tawhte chu hnuk let turin hma an la dawn tih a sawi.
Nimin veka hming pe lut, BJP State president Vanlalhmuaka pawhin zawhna chhangin MP inthlanah Mizo mipuiin BJP candidate an thlang tling a nih chuan cabinet minister a ni thei tih a sawi a, MP atana thlan tlin a nih a, minister a nih phawt chuan Mizoramin development a mamawh ang chu sorkar laipuiin a pe ngei dawn tih a sawi a, Mizorama MP candidate atangin NDA lama thu tur pakhat chauh an awm thu a sawi.
Indepedent-a ding tur, Lalhriatrenga Chhangte chuan MP candidate zingah MP nih tum chiang kuang ber anih thu sawiin, Congress atangin din tum mah se ticket a chan tak loh avangin independent-in a chuh ta tih a sawi a, ram mipuite tana hna a thawh theih nana vote theuh turin mipui a sawm.
MP election-a chuh tumte nomination paper-te chu vawiinah endik a ni dawn a, hming pe lutte tan hian inhnuhdawh leh theihna hun Inrinni thleng khian hawn a ni a, April 19-ah vote thlak a ni dawn a ni.