NBA regular season khelh mekah champion lai Denver Nuggets chuan Pathianni zing khan hnehna an chang a, Western Conference hmahruaitu thar an ni. Pathianni zinga inkhel dangah Philadelphia 76ers an chak ve bawk.
Champion lai Denver Nuggets hian an khingpui Atlanta Hawks lakah an khel tha viau a, quarter hmasa ber atanga quarter tawp ber thlengin chungnung zawkah an tang vek. Hniam lai nei lova chungnung zawk an nih vek vangin an khingpuite hi point 142-110 zetin an sawp ta nghe nghe. Hawks lakah an chak leh tak vangin champion lai Denver Nuggets hi Western Conference hmahruaitu thar an ni.
Hawks an sawp tum hian Nikola Jokic a khel tha viau a, triple-double a puitlin. Jokic hian season kal meka triple-double vawi 25 a pui tlinna ni turin Hawks lakah hian point 19 a thawkchhuak a. Ball sawhlet vawi 14 a dawn bakah assist vawi 11 a nei tling bawk. Jokic bakah hian Kentavious Caldwell-Pope chuan point 24 a thawkchhuak ve bawk.
Pathianni zinga inkhel dangah Philadelphia 76ers chuan point 116-96 in an khingpui Memphis Grizzlies an hneh ve bawk. 76ers an hmachhawn tum hian hliam damkawr Joel Embiid chuan point 30 a thawkchhuak a, ball sawhlet vawi 12 a dawng tling bawk.
Pathianni zing vek hian Los Angeles Lakers chuan point 115-97 in an khingpui Cleveland Cavaliers an hneh. LA Lakers tan hian D’Angelo Russell chuan point 28 a thawkchhuak a. Player ropui LeBron James chuan point 24 a thawhchhuah bakah assist vawi 12 a nei bawk.