Inrinni zan khan Englis Premier League (EPL) 2023-24 khelh chhunzawm a ni a, Manchester khaw club pahnih ten boruak inang lo tak an tawng. Table chung berah Manchester City an kir laiin Manchester United erawh chu pa 7-naah an tlahniam ve thung. United an chak zawh loh lai hian palina nih tuma tan khawh Tottenham chu Newcastle United lakah 3-0 ngawtin an tlawm ve bawk.
- Pa 1-naah City
Pathumnaa awm mek Manchester City chuan Etihad Stadium-ah tlahniam thei dinhmuna ding mek Luton Town an mikhual a, an mualah 5-1 ngawta hnehna changin point thum hlu tak an hmu. Luton laka point thum an hmuh hmangin an chunga awm Arsenal leh Liverpool an lehpel lai lawk a, hmahruaitu thar an ni.
City hian an mikhual lakah bul an tan tha viau a, inkhel tan atanga minute hnihna lekah goal an thawkchhuak ngei. City hian na taka an nawr rah an seng a, Luton player Daiki Hashioka chuan minute hnihna lekah an lamah a ti goal a, City hmahruaina goal a thunsak. He an vanduai goal vang hian an tan chet a harsa zui a, goal khat thun bawk mah se goal li dang an chhuah belh.
Hma takah goal thun mah se City in goal an thun belh har hle a, an goal thun belh turin darkar khat chuang zet an nghah a ngai. Hun rei tak chhung goal a luh belh theih loh hnuin Mateo Kovacic chuan minute 64-naah City goal hnihna a thun a, an hmahruaina a tizau. Kovacic goal thun hnu lawkah City an che fuh zui leh nghal zat a, minute 76-na lekah penalty an hmu. He penalty hi Erling Haaland chuan a pet goal a, an goal thumna a thun. Haaland goal thun hnu hian City player hlui Ross Barkley chuan minute 81-naah Luton Town goal neih chhun a thun a, an si phurh a sut then.
Barkley goal thun hian City a chhaih kawlh leh zual a, hun tawp dawn hnaihah goal hnih an thun belh. Jérémy Doku chuan minute 87-naah an goal lina a thun a. Minute 90+3-ah Josko Gvardiol chuan an goal ngana a thun zui leh zat a, an mualah 5-1 ngawtin hnehna an chang zui ta a ni.
Luton Town laka an chakna hmangin champion lai City in table chung ber an luah a, champion nawn leh beiseina sang zawk an neih belh. City laka an tlawm vangin Luton Town dinhmun a him lo leh zual a, tlahniam thei dinhmunah an ding mek thung a ni.
- Pa 7-naah United
Manchester khuaa an elpui lian ber Manchester City in table chung ber an luah laiin Manchester United erawh chu an hnungtawlh thung a, pa 7-naah an tlahniam. United hi hnufual zawkah tum hnih an awm hnuin AFC Bournemouth laka tlawm an pumpelh hram a, Bruno Fernandes goal hnih thun hmangin point an hlawhchhuak thei hram.
AFC Bournemouth hian an mikhual Manchester United lakah bul an tan tha viau a, minute 16-na lekah Dominic Solanke chuan hmahruaina goal a thun. Hma taka goal an thun vangin an phur viau a, khelh pawh an khel tha zui viau nghe nghe. Phur viau mah se United nawr let an tuar lova, goal an chhuah. United captain Bruno Fernandes chuan minute 31-naah goal thunin an si phurh a sut. 1-1 a nih hnuin Bournemouth an che fuh hmasa leh a, Justin Kluivert chuan minute 36-naah hma an hruai nawn lehna goal a thun a, 2-1 a hmahruai chungin chawlhlawk an hmang.
Chawlhlawk hnu lamah United in an si phurh sut tumin tan an khawh nasa viau a, penalty an hmuh an chhawr tangkai a, an si phurh an sut thei hram. Minute 65-naah Bruno Fernandes chuan penalty pet goal in an si phurh a sut nawn leh. He goal hian Erik ten Hag a fuih phur viau a, chak tumin tan an khawh nasa hle. Goal thun tumin innawr nasa viau mah se goal luh belh lovin inkhel a tawp a, palina nih hram tuma tan khawh United in point hnih hlu zet an hloh. Bournemouth laka an chak zawh loh vangin United hi parukna atangin pasarihnaah an tlahniam ta hial a ni.
- Tottenham an tlawm chiang
Inrinni zana inkhel dangah Newcastle United chuan St James Park-a an mikhual Tottenham chu si li fai ngawtin an lo sawp a, top 4 huang atangin an hnawtchhuak.
Palina nih phak beiseina chhete la nei Newcastle United hian palinaa awm mek Tottenham lakah an khel tha viau a, chawlhlawk hma leh chawlhlawk hnu lamah goal hnih ve ve an thun. Inkhel tan atanga darkar chanve na chiahah Alexander Isak chuan Magpies hmahruaina goal a thun. Isak goal thun atanga minute hnih hnu lekah Anthony Gordon chuan goal a thun belh zui leh zat a, 2-0 a hmahruai chungin chawhlawk an hmang.
Chawlhlawk hnu lamah Newcastle an khel tha chhunzawm a, goal hmahruai thuntu Isak chuan minute 51-naah an goal thumna a thun a. Fabian Schär chuan hun tawp dawn hnaih minute 87-naah an goal lina thunin a tawp a khar a, an mualah ngei team lian lakah si li fai ngawtin hnehna an chang a, point thum hlu tak an hmu. Newcastle United lakah an tlawm vangin palina atangin panganaah Tottenham an tlahniam. Spurs sawptu Newcastle hian khelh 32 atangin point 50 an hmu a, palinaa awm Aston Villa nen an inkarah point 10 a tla zep mek. An khelh that chhoh viau a, Villa leh Spurs an khelh chhiat hlauh bawk chuan Newcastle hian palina an la luah ve nawlh thei.