Pathianni zing khan hlawhtling takin UFC 300 neih a ni a, Alex Pereira chuan awlsam taka Jamahal Hill hnehin a kawnghren a humhim. Fight ngaihven hlawh dangah Max Holloway chuan Justin Gaethje a hneh a, BMF belt a hlawhchhuak ve bawk.
UFC 300-a fight ngaihven hlawh ber; light-heavyweight title inchuhnaah champion lai Alex Pereira chu mit la takin a inlan a, a kawnghren chuhpuitu Jamahal Hill chu round khatna lekah a knockout hman. Pareira hian a kut vei lamin Hill hi chiang zetin a hnek fuh siah a, a khingpui a hnek tlu. Hill tlu hi a bawhzui nghal vat a, referee in fight titawpin Pareira a chak a, a kawnghren a humhim zui ta a ni.
Insual ngaihven hlawh dangah Max Holloway leh Justin Gaethje ten BMF belt an inchuh. Inhnek thiam zawk leh fing zawk Holloway-a’n a khingpui Gaethje a thunun tluan a, che hleithei lovin a siam. American fighter Gaethje hian chak turin round tawp berah a khingpui knock out a mamawh tawh. Inhnek tawp dawn lamah thapui thawh chiam mah se che sual zawkah Gaethje hi a tang ta tlat thung. Holloway kut thlak na tak tuar zo lovin a tlu hnawk a, thochhuak tur a awm tawh lo. A khingpui ber thochhuak tur a awm tawh lo vangin Holloway chuan hnehna a chang a, BMF belt a kawl zui ta a ni.
UFC 300-ah hian hmeichhe lamah China nula pahnih Zhang Weili leh Yan Xiaonan ten strawweight title an inchuh. UFC-ah China mi ve ve in kawnghren an inchuhna hmasa berah hian champion lai Weili chuan unanimous decision hmangin Xiaonan a hneh a, a kawnghren a humhim.