Ningani zing khan NBA play-off khel tur zawnna ‘Play In’ khelh chhunzawm a ni. Eastern Conference atanga play in khelhah Philadelphia 76ers chuan Miami Heat an hneh a, play-off khel turin an tling. Inkhel dangah Bulls laka an tlawm vangin Atlanta Hawks in play-off an khel phak lo thung.
Play-off khelh phak inchuhnaah Philadelphia 76ers leh Miami Heat te an inhnehtawk hle. Inkhel hmuhnawm takah Heat an vanduai a, point khat lekin 76ers an hneh lo. 76ers lakah uiawm takin tlawm vawk mah se Miami Heat hian play-off khelh phak theihna hun remchang an la nei thei dawn a, Chigaco Bulls nen play in hnuhnung an khel ang. Bulls an hneh a nih chuan Eastern Conference hmahruaitu Boston Celtics hmachhawn turin an tling ang a, an chak loh erawh an tla thung ang.
Philadelphia 76ers leh Miami Heat te hian inhnehtawk takin bul an tan a, quarter khatnaah point khatin Heat an chungnung thei hram. Quarter hnihnaah Heat an khel tha chhunzawm a, point 11 a chungnungin point 12 a hmahruai chungin chawlhlawk an hmang.
Chawlhlawk hnu lamah 76ers an insiamtha a, an khingpuite an lehthal ta hial. 76ers hi quarter thumnaah point 7 in an chungnung a, an khingpuite nen an inkar an tizim. Quarter linaah chak zawk nih tumin an inum leh chiam a, 76ers chu point 6 in an chungnung zui leh a, chak tura an mamawh point an thawkchhuak chiah chiah. Inkhel hmuhnawm takah Philadelphia 76ers chuan point 105-104 in hnehna an chang, play-off khel turin an tling. 76ers hian Eastern Conference-a pahnihna New York Knicks an hmachhawn ang.
Miami Heat an hneh tum hian Philadelphia 76ers tan Joel Embiid chuan point 23 a thawkchhuak a, Nicolas Batum chuan point 20 a thawhchhuah bakah assist vawi 15 lai a nei bawk a, Heat an hneh let theih nan a thawh hlawk hle.
Ningani zinga inkhel dangah Chicago Bulls chuan an khingpui Atlanta Hawks chu point 131-116 in an sawp a, play-in final a khel zui leh dawn a, Miami Heat an hneh chuan play-off khel turin an tling ang.
Atlanta Hawks an hneh tum hian Bulls tan Coby White a khel tha viau a. NBA-a point a thawhchhuah tam ber tum tawngin point 42 a thawkchhuak. Nikola Vucevic chuan point 24 a thawhchhuah bakah ball sawhlet vawi 12 a dawng tling bawk.