USA chuan Paris Olympic Basketball a an ram aiawh tur mipa team an puang zar a, NBA player langsar Stephen Curry leh Kevin Durant te an tel.
USA aiawh tur mi 12 zingah Stephen Curry chuan hmun a chang ve ta nge nge a, a vawi khat nan Olympic-ah a inlan dawn. NBA 2023-24 ah Golden State Warriors an che tha lo viau a, play-off an khel phak lo. Play-in pal tlang zo lo mah se Warriors tan hian Curry hi a khel tha viau thin thung a, USA team-ah a tel zui ta reng bawk. Olympic-ah USA an champion a nih chuan Basketball a Curry ropuina belhchhahin a awm ang.
Olympic-ah a vawi khat na atan Curry a inlan dawn laiin Phoenix Suns player pawimawh Kevin Durant erawh chu Olympic-ah vawi li champion tumin a inlan ve dawn thung. Paris Olympic 2024- Basketball-ah USA an champion a nih chuan Durant hi Olympic Gold Medal pali awrh thei hmasa ber a ni ang. Durant bakah hian LA Lakers player pawimawh, khawvela basketballer ropui ber ang hiala ngaih ni bawk; LeBron James pawh USA team-ah a tel a. James hian kum 2012 hnu lama a vawi khat nan Olympic a hmachhawn dawn. James rual hian MVP ni mek Joel Embiid pawh USA team-ah a tel bawk a, USA hian Basketball-ah champion an tum hle.
Basketball World Cup 2023-ah USA hi an mualpho a, palina an ni pha tawk. World Cup-ah an chet chhiat vangin Olympic champion nih ngei tumin tan an khawh a, an player kohte pawh an hrawl hreihhrawih hle. USA team hi Golden State Warriors head coach Steve Kerr-a’n head coach niin a kairhruai ang a. Mark Few (Gonzaga University), Tyronn Lue (LA Clippers) leh Erik Spoelstra (Miami Heat) ten an pui ang.
- USA Olympic basketball team
Bam Adebayo (Miami Heat), Devin Booker (Phoenix Suns), Stephen Curry (Golden State Warriors), Anthony Davis (Los Angeles Lakers), Kevin Durant (Phoenix Suns), Anthony Edwards (Minnesota Timberwolves), Joel Embiid (Philadelphia 76ers), Tyrese Haliburton (Indiana Pacers), Jrue Holiday (Boston Celtics), LeBron James (Los Angeles Lakers), Kawhi Leonard (LA Clippers), Jayson Tatum (Boston Celtics).