April 17, Nilai zan khan UEFA Champions League quarter-final khelh zawh a ni a, Real Madrid leh Bayern Munich ten hnehna changin semi-final an lut. Real Madrid hian Etihad Stadium-ah champion lai Manchester City an hneh a. Bayern Munich in an mikhual Arsenal chu 1-0 in an hneh ve bawk.
- Real in phuba an la
UCL a club hlawhtling ber Real Madrid leh tunlaia club tha tak Manchester City te hi tunhnaiah an intum thei viau a, season thum chhung an intum zawn tawh. 2022-23 season khan semi-final-ah an intum a, awlsam takin Manchester City an chak. Real Madrid an hnawhchhuah hnuin City hi champions league-ah a vawi khat nan an champion zui nghe nghe. Season kal mek UCL quarter-final-ah an intum zui leh zat a, Real Madrid chuan season hmasaa an tlawmna phuba lain an chak a, semi-final an lut.
Manchester City leh Real Madrid te hi Santiagoe Bernabeu-ah 3-3 in an lo inhnehtawk tawh a, Etihad Stadium-a in khel an nih vangin City in semi-final luh ngei an inring hle. City hian an mikhual Real Madrid lakah ball chang hnemin, statistic hrang hrangah chungchung zawk viau mah se a pawimawh ber goal an thun tam thei bik lo. Hun pangngaiah 1-1 in an inhnehtawk a, penalty shoot-out a vannei zawk Real Madrid in semi-final an lut.
Etihad Stadium a lenglut Real Madrid hian bul an tan tha viau a, inkhel tan atanga minute 12-na lekah Rodrygo chuan hmahruaina goal a thun. Rodrygo goal thun vang hian si belhkhawmah 4-3 in hma an hruai chiah a, City aiin semi-final an hnaih ta zawk. Hma takah goal an thun vangin an phur hle a, an vawk lal lenna champions league a lo ni bawk nen ngampa takin Etihad Stadium-ah an inlan chhunzawm a, ball chang tam lo mah se awmze nei takin a khel tluan.
Hma taka goal an chhuah vangin City in goal thun an tum ngawrh hle. Game an hnuhnung hneh zui viau a, City in khuang an beng a, Real Madrid an lam a ni ta ber mai. Ball chan tam lam, shot, shot on target leh corner-ah chungnung zawk ni vek mah se Pep Guardiola team in goal an thun thei lawk lo va, an si phurh sut turin an nghak rei hle. Hun rei tak chhung goal an thun theih loh hnuin Kevin De Bruyne chuan minute 76-naah goal thunin an si phurh a sut ta nge nge.
Si belhkhawmah 4-4 a an inhnehtawk hnuin inkhel a hmuhnawm zui viau a, City nawrna nasa tak karah Real an him hram hram zel a, hun pangngaiah goal an chhuah belh lo. Hun pangngaiah chak zawk an awm theih loh vangin extratime khelh chhunzawm a ni a, minute 30 dang an khelh belh leh pawhin goal thun thei an awm chuang lo va, 1-1 a inhnehtawk chungin a tawp.
Extratime-ah pawh chak zawk an awm theih loh cheu vangin penalty shoot-out hmangin semi-final lut tur zawk zawn chhunzawm a ni. Penalty-ah hian Real Madrid in bul an tan tha lova, Real Madrid senior player Luka Modric chuan a thelh nghal. Modric-a’n a thelh hnu hian City tana pettu pahnih; Bernardo Silva leh Mateo Kovacic ten an thelh zawn ve thung. An hnunga pettu ten an pet goal vek a, Chelsea defender hlui Antonio Rüdiger chuan Real Madrid chakna goal a thun a, champion lai Manchester City lakah 4-3 in hnehna an chang a, semi-final an lut ta a ni.
Real Madrid lakah an tlawm tum hian City in ball 67% zet a chang a, shot on target vawi 9 leh cornet vawi 18 zet nei chungin goal khat bak an thun thei lo. Bet zawk leh ball chang tlem zawka tang ngar ngar chungin Real Madrid in hnehna an chang daih a. He hnehna hian champions league-ah Real Madrid chungchuan bikzia a nem nghet chiang hle.
- Bayern an chak
Nilai zana inkhel dangah Bayern Munich chuan Allianz Arena-a an mikhual Arsenal chu minute 63-naa Joshua Kimmich goal thun hmangin an hneh a, si belh khawmah 3-2 a hnehna changin semi-final an lut. Semi-final ah he inelnaa an ngam loh than tak Real Madrid an hmachhawn zui leh dawn a. Final lut turin fiahna hautak zet mai an paltlang a ngai dawn.