- Ruata
Toyota Kirloskar Motor chuan an SUV lar leh hlun, Fortuner chu special edition thar, Leader Edition an tlangzarh.
Toyota Fortuner Leader Edition-ah hian ken tel thar neuh neuh a awm ang a, a landan leh a nihna pumpuiah erawh Fortuner pangngai chhuak mek nen danglamna a lian chuang lo a. Toyota mawina pholang zel si, thil chi dang deuha thawm a ni mai dawn a ni
Toyota Fortuner Leader Edition hi 4×2 in a chhuak dawn a. A man tur hi tarlan a la ni lo a, hetihrual hian tuna 4×2 version Fortuner pangngai chhuak mek chu Rs. Nuai 35.93 – 38.21 inkar man a ni mek a, heng ai hian a to hret hmel a ni.
Toyota Fortuner Leader Edition hian 2.8L diesel, 4X2 set-up niin 204bhp power leh 420Nm (MT)/500Nm (AT) torque a pechhuak thei a. Dual-tone colour scheme – Silver Metallic with Black accent, Platinum Pearl White with Black accent leh Super White with Black accent te duhthlan tur a awm a ni.
A pawn lamah chuan Toyota Fortuner Leader Edition hian a hma leh hnung bumper spoiler-ah te danglamna tlem a nei a. Black alloy wheel thar neiin hei hian a lan dan a ti ‘sport’ em em a ni. A chhung lamah chuan Fortuner Leader Edition hian wireless charger, dual-tone seat upholstery, auto folding ORVMs leh tyre pressure monitor a nei a ni.
- New Generation Fortuner kum 2025-ah?
Fortuner Leader Edition an tlangzarh pah hian Toyota chuan Fortuner SUV hi India ramah nuai 2 leh sing 5 chuang an hralhchhuak tawh tih an sawi a. Hei hi India rama kan hmuh tan, kum 2009 atangin a ni. Tunah hian generation thar model, design thar hlak tichhuak turin Toyota hian ruahmanna a siam chho mek bawk a. Hei hi kum 2025 kum tir lamah kan hmuh theih tawh hmel a ni.
Toyota Fortuner thar hlak tur hi kumin kumtawpah hian khawvel hmundang thenkhatah chuan phochhuah tan a nih tawh beisei a ni a. Generation thar model-ah hian Level 2 ADAS (advanced driver assistance system) technology a awm ang a. Vehicle stability control leh electric steering pawh a nei ang. He Fortuner thar chhuak tur hian mild hybrid khawl, 2.4L turbo petrol engine a hmang ang a. India ramah chuan 2.8L diesel khawl a hman mek hi a hman zui zel hmel thung a, 48V mild hybrid technology a nei ve ang em tih hi sawichian theih a la ni lo bawk a ni.