Ningani zing khan NBA Eastern Conference play-off game hnihna khelh a ni a, Miami Heat chuan Boston Celtics an hneh nawlh a, series-ah 1-1 a ni chiah. Ningani zinga inkhel dangah Oklahoma City Thunder chuan New Orleans Pelicans an hneh nawn leh thung.
Play-off game khatnaa tlawm Miami Heat hian game khatnaa an hneh loh Celtics lakah bul an tan tha a, quarter hmasa berah point khatin chungnung zawkah an tang. Quarter hmasa berah hnufual zawk ni mah se Celtics an insiamtha thuai a, quarter hnihnaah point liin an chungnung a, point thuma hmahruai chungin chawlhlawk an hmang.
Chawlhlawk hnu lamah Miami Heat an khel tha a, an hawi kir tawh lo. Play-in paltlang a, play-off khel phak hram Miami Heat hi quarter thumnaah point 9 in an chungnung a, quarter hnuhnung berah point liin an chungnung zui leh a, point 111-101 in hnehna hlu tak an chang a, Series-ah 1-1 niin, Celtics an nihrual. Miami Heat hian hliam vangin an player pawimawh Jimmy Butler leh Terry Rozier te an chhawr thei lova, an ni pahnih hi an chhawp kawp theih hunah phei chuan inrintawkna sang tak an nei ngei ang.
Ningani zinga inkhel dangah Oklahoma City Thunder chuan play-off game khatnaa an hneh tawh New Orlean Pelicans an hneh nawn leh a, series ah 2-0 in hma an hruai a, chak an hnaih deuh deuh zel. Oklahoma tan hian Shai Gilgeous-Alexander chuan 33 a thawkchhuak a, hei hi NBA post season-ah point a thawhchhuah hnem ber tum a ni.