Nilai zan khan French Ligue 1 khelh chhunzawm a ni a, champion lai Paris St-Germain chuan Lorient lakah 4-1 ngawtin hnehna an chang a, champion an hnaih deuh deuh zel. PSG tan hian Mbappe leh Dembele ten goal hnih ve ve an thun.
Table-a hmahruai mektu PSG hi Lorient hmachhawn turin Stade du Moustoir – Yves Allainmat-ah an lenglut a, mikhual an nihna maulah an khel tha viau a, chawlhlawk hma leh chawlhlawk hnu lamah goal hnih ve ve an thun. Inkhel tan atanga minute 16-naah Ousmane Dembélé chuan hmahruaina goal a thun. Dembele goal thun atanga minute ruk hnu lekah Kylian Mbappe chuan an goal hnihna a thun zui leh a, si hnih faia hmahruai chungin chawlhlawk an hmang.
Chawlhlawk hnu lamah PSG an khel tha chhunzawm a, goal an thun leh thuai. Goal hmahruai thuntu Dembele chuan minute 60-naah goal thunin an hmahruaina a tizau. An mualah si thum fai ngawta an Lorient in an mualpho lutuk tur thup mawi nan goal an thun a, minute 73-naah Mohamed Bamba chuan goal thunin an si phurh a sut then. Bamba goal thun vangin Lorient phur thar mah se an phur rei lova goal an chhuah leh thuai. Hun tawp dawn tep minute 90-naah Kylian Mbappe chuan an goal lina thunin a tawp a khar a, Lorient mualah 4-1 in hnehna an chang zui ta a ni.
Lorient lakah point thum an hmuh hmangin PSG hian champion an hnaih leh zual. Nilai zana inkhel hnuhnung zawkah Lille in Monaco an hneh a nih chuan PSG hi an champion chiang nghal dawn a. Monaco hian an mikhual Lille hi an hneh si vangin PSG an la champion chiang bik lo. PSG hian inrinni zan khian an mualah Le Havre an mikhual dawn a, an mualah ngei an chak a nih chuan a zawna a vawi thum nan French Ligue 1-ah an champion ang.