Liverpool chuan an hnen atanga chhuak tur Jurgen Klopp hmunruak luahtu tur duh an thlang fel ta a, Feyenoord coach Arne Slot nen inremna thui tak an nei tawh.
Liverpool manager ropui Jurgen Klopp chuan season tawp rualin Anfield a chhuahsan tur thu a lo puang tawh a. Reds hian Klopp hmunruak luahtu tur an dap nghal ruai ruai. Bundesliga-a Bayer Leverkusen champion puitu Xabi Alonso chu an manager thar ni tura an duh ber ni bawk mah se, Alonso hian Leverkusen-a cham chhunzawm a thlang. Alonso an ruai thei dawn lo tih an hriat hnuin Sporting Lisbon manager Ruben Amorim nen sawi zawm an ni leh renrawn bawk. Amorim nen sawizawm an nih lai mekin thawm dang arawn awm thut a, chu chu Arne Slot chungchangah Feyenoord nen inremna an nei tih hi a ni.
Reds hian Feyenoord atanga Arne Slot lak nan £9.4m sen an remti a. Dutch club lian lakah hian £7.7m (9m euros) an pe phawt ang a. Slot hnuaia an chetthat dan a zirin Feyenoord hi £1.7m (2m euros) an pek belh leh ang.
EPL club hlun head coach thar tur Slot hian 2022-23 season khan Feyenoord hi Dutch League Eredivisie-ah a champion pui a, season kal mekah Dutch Cup-ah a champion pui leh tawh naa League-ah erawh pahnihna an ni thung. An khingpuite nawr nuamti mi a ni aa kum a la upa lo bawk nen Reds hian player tha chherchhuak a, an team siam lian turin an duh a, team kaihruai turin an la lut dawn ta a ni.
Liverpool leh Slot te hian eng emaw chen chu inremna an nei tawh a, contract rei zawng turah inremna an la nei fel lova, an inrem thuai tura ngaih a ni.