Inrinni zana English Premier League khelhah club lian pathum, Liverpool, Manchester United leh Chelsea te an chak zo lo vek. West Ham United lakah an chak zawh loh vangin Liverpool in champion an beiseina a chuai deuh deuh zel a. United tan pawh UCL khelh phak a harsa deuh deuh zel bawk.
- West Ham in Reds an chelh
Tunhnaia result tha neih harsat Liverpool chu chak mamawh tak chungin London Stadium-ah an lenglut. Reds hian an lenluhna mualah chak theihna hun tha nei bawk mah se an hmahruaina an venghim zo lova, hnehna an chang zo lo.
London Stadium-a inkhel hmuhnawm takah hian mualneitu West Ham in goal an thun hmasa a, Jarrod Bowen chuan minute 43-naah hmahruaina goal thunin, he goal hmang hian 1-0 a hmahruai chungin chawlhlawk an hmang.
Chawlhlawk hnu lamah Liverpool an khel tha a, goal an thun thuai. Minute 48-na lekah Andy Robertson chuan goal thunin an si phurh a sut. An si phurh an sut hnu lawkah Reds an chefuh zui leh a, Alphonse Areola chuan minute 65-naah an lamah a ti-goal a, Liverpool hmahruaina goal a thunsak. An mualah hnufual zawk ni mah se Hammers an insiamtha thuai a, Michail Antonio chuan minute 77-naah goal thunin an si phurh a sut. Antonio goal thun hnu hian goal dang a luh belh tawh lova, West Ham leh Liverpool te chu 1-1 in an inhnehtawk zui ta a ni.
West Ham lakah an chak zawh loh vangin Liverpool tan champion beisei ngam a har ta hle. Reds hian khelh 35 atanga point 75 hmuin pathumna an luah mek a. An chunga awm Arsenal leh Manchester City te an khel tam zawk thung. Heti a nih vang hian an tan champion a har tawh dawn a, an champion theih nan Arsenal leh City an chetsual tel ve a ngai tawh dawn. West Ham nen an inhnehtawk tum hian Liverpool player pawimawh Mohamed Salah leh manager Jurgen Klopp te chu thelh ngai khawpin an inhnial buai a. He thil thleng hian sawizui a hlawh hle nghe nghe. An inhnial buai chungchang zawhna chu Salah chuan, “tuna ka sawi mai chuan boruak a sosang lutuk palh ang'” tiin a pehhel thung.
- United an chak teuh
Inrinni zan hian Manchester United chuan table hnuai ber dawttu-a awm mek Burnley chu Old Trafford-ah an mikhual a, an mualah an chak teuh hle. United hian Antony goal hmanga an hmahruaina chu penalty an chawi vangin an humhim thei lo.
Old Trafford-ah tlakhniam pumpelh tuma tan khawh Burnley in beisei phak bakin an khel tha a, an goal an venghim rei hle. Hun rei tak chhung goal an thun theih loh hnuin Antony chuan minute 79-naah United hmahruaina goal a thun. He goal hi an chakpui a rinawm hman viau laiin hun tawp dawn hnaiah penalty an chawi tlat thung. Burnley tan hian Zeki Amdouni chuan minute 87-naah penalty a pet goal in an si phurh a sut. Hun tawp thlengin goal dang a luh belh thei lova, Burnley chuan Old Trafford-ah tlawm an pumpelh hlauh a, him theih beiseina sang zawk an nei.
- Chelsea in Villa an chelh
Season kal meka beisei phak lo ber zinga mi Chelsea chu Villa Park-ah an lenglut a, mualneitu Aston Villa lakah tum hnih ngawt an hnufual hnuin an si phurh an sut ve ve a, Villa chak tur an chelh. An mualah an chak zawh loh vangin Villa tan top four huang luah chunga season khat a hautak leh zual dawn.
Palinaa awm mek Aston Villa hian an mualah bul an tan tha viau a, minute lina lekah Chelsea player Marc Cucurella chuan an lamah a ti-goal a, Villa hmahruaina goal a thunsak. Cucurella own-goal vanga hma an hruai hnuin Morgan Rogers chuan minute 42-naah an goal hnihna a thun a, 2-0 a hmahruai chungin chawlhlawk an hmang.
Chawlhlawk hnu lamah Chelsea in tlawm pumpelh ngei tumin tan an khawh a, goal hnih an thun thei hram. Noni Madueke chuan minute 62-naah an goal khatna a thun a. Hun tawp dawn hnaih minute 81-naah Conor Gallagher chuan goal thunin an si phurh a sut zo. Hun tawp thlengin goal a luh belh thei lova, 2-2 a inhnehtawkin, point khat ve ve an hmu. An mualah an chak zawh loh vangin Villa in an hnuai chiaha awm Tottenham an tlansan hla thei rih lo. Villa hi an hnuai chiaha awm Tottenham aiin point 7 ngawtin an sang zawk mek naa vawi thum ngawta an khel tam zawk vangin an dinhmun a la him bik lo viau thung.