Inrinni zana English Premier League khelhah table mawngphah Sheffield United chu Newcastle United lakah an tlawm a, EPL ah inhamtang zo lovin championship-ah an tlahniam. Sheffied an tlakhniam lai hian an muala chak Everton chu EPL khel turin an him chiang ve thung.
Table mawngphaha awm mek, him beisei zui thei tura chak mamawh Sheffield United hian St James Park-ah bul an tan tha viau a, goal pawh an thun hma hle. Inkhel tan atanga minute 5-na lekah Anel Ahmedhodzic chuan hmahruaina goal a thun. Hma taka goal an thun vangin an phur a, Newcastle hneh theih beiseina sang tak an nei. Goal chhuah hma viau mah se mualneitu Newcastle an insiamtha thai a an si phurh an sut har lo. Cub lian zawkte ngaihven Alexander Isak chuan minute 26-naah goal thunin an si phurh a sut. Isak goal thun hnu hian goal dang a luh belh lawk lo va, 1-1 a inhnehtawk chungin chawlhlawk an hmang.
Chawlhlawk hnu lamah Newcastle an khel tha ta viau a, goal li ngawt an thun belh. Minute 54-naah midfielder ngaihven hlawh Bruno Guimarães chuan hma an hruai letna goal a thun. Hnufual zawk an nih hnuin Sheffield an chesual a, penalty an chawi. An si phurh sutna goal thuntu Isak chuan penalty a pet goal a, minute 61-naah an goal hnihna a thun. Isak goal thun hnu hian Ben Osborn chuan an lamah ti-goal in Magpies goal lina a thunsak a. Callum Wilson chuan minute 72-naah an goal ngana thunin a tawp a khar. St James Park-ah 5-1 ngawta an tlawm vangin Sheffield United hi khawvela tualchhung league hautak leh sum tamna ber EPL-ah an inhamtang zo lova, championship-ah an tlahniam dawn ta a ni.
Championship lama tlahniam tur Sheffield United hian vawi 35 khel tawhin vawi thum chiah an chak a, draw vawi 7 an neih bakah vawi 25 zet tlawm zawkah an tang tawh. Khelh hmabak vawi thum chauh an nei tawh a, 18-na aia sanga inhlangkai thei an nih tawh loh vangin hreh tak chungin an tlahniam dawn ta a ni.
- Everton an him
Sheffield United an tlakhniam lai hian Everton erawh chu an mualah an chak a, EPL khel zui turin an him chiang ve thung. Everton hian Goodison Park-ah an chunga awm mek Brentford an mikhual. An mikhual lakah hian minute 60-naa Idrissa Gueye goal thun an chakpui a, an mualah point thum hlu tak an hmu. An muala point thum an hmuh hmang hian an him chiang nghal a, point paihsak vangin dinhmun derthawngah ding thin mah se tunah chuan an him chiang ta a ni.