Pathianni zing khan NBA play-off khelh chhunzawm a ni a, Denven Nuggets lakah vawi thum tlawm zawn tawh Los Angeles Lakers chuan hnehna an chang ve nawlh. Pathianni zinga inkhel dangah Boston Celtics in Miami Heat an hneh ve bawk.
LA Lakers hian vawi 11 zet an hneh loh zawn tawh Denver Nuggets lakah bul an tan tha viau a, quarter hmasa pahnihaah chungnung zawkah an tang vek. Quarter hnuhnung berah hnufual ve zeuh mah se an hmahruaina an humhim thei a, hnehna an chang ve ta nawlh. Denver lakah a vawi khat nan an chak vangin semi-final luh beiseina an la nei a, semi-final lut turin an khelh hmasak pathumah an chak vek a ngai tawh thung.
Vawi khat tlawm hlek pawh tla mai tawh tur LA Lakers hian quarter khatnaah point 28-ah an thawkchhuak a, point ngain an chungnung nghal. Quarter hnihnaah point 8 in an chungnung zui leh a, point 13 a hmahruai chungin chawlhlawk an hmang. Chawlhlawk hnu lamah Denver game a kang hret a, quarter thumnah point hnihin an chungnung. Quarter hnuhnung berah chak tumin an inum tawn nasa viau a, point 28 ve ve thawkchhuakin chungnung zawk an awm thei lo. Inkhel hmuhnawm takah LA Lakers in point 119-108 in hnehna an chang. Pathianni zingah tlawm mah se Denver Nuggets hian 3-1 in hma an hruai a, semi-final lut turin an dinhmun a la tha viau tho thung.
Dever Nuggets an hneh tum hian Lakers player pawimawh LeBron James chuan point 30 a thawkchhuak. James rual hian Anthony Davis pawh a chetha a, point 25 thawkchhuakin ball sawhlet vawi 23 a dawng bawk. Denver lakah vawi 11 zet an tlawm zawn tawhna chu an titawp ve ta nge nge a ni.
Pathianni zinga inkhel dangah Boston Celtics chuan Miami Heat an hneh a, series ah 2-1 in hma an hruai. Point 104-84-a hnehna an chan tum hian Celtics tan Jayson Tatum chuan point 22 a thawkchhuak a, ball sawhlet vawi 11 a dawng tling bawk. Inkhel dangah Orlando Magic chuan point 112-89 in Cleveland Cavaliers an hneh a, series ah 2-2 in an inhnehtawk mek. Hetihlai hian 3-0 a hmahruai turin Oklahoma City Thunder chuan New Orleans Pelicans an hneh ve thung.