Chief Minister Lalduhoma’n Mizoram Public Service Commission (MPSC) hnuaia hna lak danah thil fel lo engmah a lo awm lo tih sawiin, a chhui tu tura ruat M Lalmanzuala, IAS (rtd) report chu pawmsak a nih thu a sawi.
Zirtawpnia CMO-a thu thar thehdarhtute a kawmnaah The Zozam Times zawhna chhangin chief minister Lalduhoma chuan, MPSC hna lak danah thil fel lo a awm lo tih a chhuitu tura an ruat, M Lalmanzuala chu an mi rin a nih avangin a chhui fiah hna thawk turin a kutah an dah tih sawiin, “A report pawh a thui khawp mai,” a ti.
Chief Minister Lalduhoma chuan MPSC hnuaia hna lak danah thil fel lo engmah a awm lo tih a sawi a. A chhuitu tura ruat M Lalmanzuala chuan answer script-a mark pek nawh reh tak te, mark pekna tura ziahna tur te nen an nawhreh te chu khaikhinin, inmil lo a awm lo a, mark tihdanglam pawh a awm lo niin a chhuitu chuan a sawi tih a sawi.
MZP puhna chu a dik ta lo zawk em? tia zawhna chu chief minister chuan, “Anni kha chuan chhui chian ni rawh se tih kha an ngenna a ni a. Chhui chian tir a ni tawh a, a bak han chhui chian leh ngaihna a awmin ka hre lo va. Chuvangin, Pu Manzuala report kha kan pawmsak tawh a. IO berin inquiry a laknaah thil fel lo a awm hmuh tawh loh kha chuan chhui leh mah ila, hmuh chhuah tur dang kha a awm tawh lo a ni. Mi hrang hrang a kawm a, statement a la a, a tih theih zawng zawng a ti a ni,” tiin a chhang bawk.