England tualchhungah Football-a chawimawina ngaihhlut hlawh tak chu football chanchin ziaktute thlan; Football Writers’ Association te Football Writers’ Association Footballer of the year a ni. FWA footballer of the year chawimawina dawng tur puan a ni a. Manchester City player pawimawh pahnih; Phil Foden leh Khadija Shaw te chaiwmawina ngaihhlut hlawh an dawng.
Mipa lamah FWA footballer of the year a thlan Phil Foden hian season kal meka inelna hrang hrangah a khel tha tluang viau a. English Premier League-ah goal 16 lai a thun tawh. City tan inelna hrang hrangah vawi 50 khelin, goal 24 a thun a,m assist vawi 10 a nei bawk. City tan a chet that bakah England tan a chetha viau bawk a, chawimawina sang dawn phuin a inlan.
FWA Player of the year 2023-24 chawimawina dawng turin Foden hian vote 42% zet a hmu. Foden hnuaiah hian Aesenal leh England player pawimawh Declan Rice a awm a. Manchester City leh Spain midfielder pawimawh Rodri chu pathumna a ni ve thung.
Mipa lamah Foden a chungnun ber lai hian hmeichhe lamah pawh Manchester City player pawimawh Khadija Shaw chuan FWA Footballer of the year chawimawina a dawng ve bawk.
Kum 27 mi Shaw hian Women’s Super League season kal mekah City tan vawi 18 a khel a, goal 21 zet thun tawhin, top scorer a ni mek. He chawimawina dawng tur hian Chelsea leh Jamaica player pawimawh Lauren James leh City tana a khelhpui Alex Greenwood te a khum. FWA hian hmeichhe lama chawimawina hi kum 2018 atang khan an sem a. City player zingah Nikita Parris chu he chawimawina dawng hmasa ber a ni a. Shaw hi City player zingah he chawimawina dawng pahnihna a ni.