Thawhtan zing khan NBA playoff conference semi-final khelh chhunzawm a ni a, game hmasa pahniha tlawm Denver Nuggets chuan hnehna chang nawn lehin Minnesota Timberwolves an nihrual. Inkhel dangah Indiana Pacers in New York Knicks an sawp.
Champion lai Denver Nuggets hian semi-final game hmasa pahnihah bul an tan tha lo viau a, Minnesota Timberwolves lakah an tlawm zawn. Game hnih an tlawm zawn hnuin semi-final game thumnaah hnehna an chang ve ta nawlh a, beiseina thar an nei. Thawhtan zinga khelh game linaah hnehna an chang nawn leh a, final lut turin inrintawkna sang zawk a nei thar.
Denver hian Minnesota lakah bul an tan tha a, quarter hmasa berah point ngain an chungnung nghal. Quarter hmasa berah an chungnung hnuin quarter hnihnaah an khel tha lehzual a, point 10 ngawtin an chungnung a, point 15 a hmahruai chungin chawlhlawk an hmang.
Chawlhlawk hmain khel tha lo viau mah se chawlhlawk hnu lamah Minnesota an insiamtha a, an khingpuite an nawr let na hle. Minnesota hi quarter thumnaah point liin an chungnung a, quarter hnuhnung berah point thumin chungnung zui leh mah se an khingpuite hi point 8 in an umphak zo lo va, game hnih an tlawm zawn ve ta a ni.
Minnesota Timberwolves laka an chak nawn leh theih nan MVP thar Nikola Jokic chu Denver Nuggets tan a khel tha viau a, point 35 a thawk chhuak. Denver tan hian Aaron Gordon chuan point 27 a thawkchhuak a, Jamal Murray pawhi point 19 a thawkchhuak ve bawk. Semi-final game lina point thawkchhuak hnem ber chu Minesota player pawimawh Anthony Edwards a ni a, point 44 zet a thawkchhuak.
Thawhtan zinga inkhel dangah Indiana Pacers chuan point 32 zetin an khingpui New York Knicks an sawp a, series ah 2-2 a ni ve ta chiah bawk.