Chawlhkar tawp khan tualchhung league hrang hrang khelh chhhunzawm a ni a, football-ah hnuhma thar hmuh tur a awm nual. Europe-a league lian zual pangaa thil thleng langsar zual kan thlir kual ang a, player ropui pahnih Lionel Messi leh Cristiano Ronaldo te hnuhma kan thlir tel zuai bawk ang.
- English Premier League
Pathianni zan khan EPL-ah inkhel pakhat a awm a, Old Trafford-ah team lian pahnih; Manchester United leh Arsenal an inkhel. Inkhel ngaihven takah hian Arsenal in hnehna an chang a, table-ah hma an hruai let leh. Arsenal hi EPL season kal mekah vawi 27 an chakna a ni a, EPL season khata an chak tam ber tum niin, club record thar an siam. Gunners hi EPL season khata an chak tam ber record chu vawi 26 an chak tum a ni a. 2003-04, 2001-02 leh 2022-23 season ah khan vawi 26 an lo chak tawh a ni.
Manchester United laka Arsenal chakna goal thuntu Leandro Trossard khan season kal mekah Arsenal chakna goal vawi li a thun chiah a. Hei hi football a khelh tawh chinah chakna goal a thun tam ber tum a ni.
Arsenal hian season kal mekah goal chhuah loh (clean sheet) vawi 11 an nei tling chiah. Season kal mekah clean sheet ngah ber an nih vangin an si nghak David Raya chuan si nghak tha ber chawimawina (Golden Glove Award) a dawng dawn chiang tawh a. Arsenal hian EPL season khata clean sheet ngah ber Chelsea record tluk turin game khat chiah an mamawh tawh a. EPL-ah season khata clean sheet ngah ber Chelsea hian 2008-09 season khan clean sheet vawi 12 an nei.
Team ropui Manchester United an che chhe tluang a, season kal mekah vawi 9 ngawt an tlawm der tawh a, hei hi season khata an tlawm tam ber tum record ding lai nen a intluk der tawh a. Red Devils hian season khata vawi 9 tlawmna hi season li an nei tawh a, chungte chu; 1920-21, 1930-31, 1933-34, 1962-63 leh 1973-74 te an ni.
United hian season kal mekah goal 82 zet an chhuah tawh a, hei pawh hi kum 53 zet hnuah season khata goal an chhuah tam ber tum a ni bawk a. 1970-71 season-a an goal chhuah zat an nihrual. Che chhe tluang tak United hi an goal diffenrence chu -4 a ni mek.
Manchester City midfielder ropui Kevin de Bruyne chuan EPL-ah assist vawi 111 zet a nei a, assist ngah lamah pahnihna ni mek Cesc Fàbregas record a nihrual. De Bruyne hian EPL-ah assist vawi 111 nei turin game 258 chiah a mamawh a. Hetihlai hian Cesc Fàbregas chuan asssist vawi 111 nei turin game 350 zet a mamawh ve thung. EPL-ah hian assist vawi 162 zet nei Ryan Giggs chu assist nei ngah ber a ni mek.
Rodri chuan EPL a hmachhawn hnuhnung vawi 48-ah tlawm a nei lova, vawi 39 chak in, draw vawi 9 an nei. Rodri chungah hian Sol Campbell (Game 56 tlawm nei lo) chiah a awm.
Chelsea chuan season kal mekah Yellow Card vawi 101 an hmu tling tawh a, EPL season khata yellow card hmu hnem ber record, kum 2021-22 season a Leeds United record siam an nihrual.
- Spanish LaLiga
Champion thar Real Madrid chu season kal mekah tlawm bei lovin khelh 29 chhung an kal tluang tawh a, season khatah tlawm nei lova an kaltluan rei ber record an tizau zual zel a. Hemi rual hian La Liga-ah tlawm lova an kal tluan rei ber (30 in 1988-89) record tluk turin game khat chiah an mamawh tawh bawk.
Diego Simeone chuan a club enkawl mek Atletico Madrid chu inelna hrang hrangah vawi 400 a chak pui tawh a, hei hi manager zinga Real Madrid chakpui hnem ber Miguel Muñoz (357) leh manager zinga Barcelona chakpui hem ber Johan Cruyff (244) chakpui zat aiin a tam zawk.
Atletico Madrid si nghak Jan Oblak chuan La Liga-ah clean sheet vawi 158th a nei tling tawh a, La Liga-ah clean sheet ngah zual parukna a ni mek.
Athletic Club chu an mualah tlawm nei lovin vawi 17 an kal tluang tawh a, an mualah tlawm nei lova an kal tluan rei record awmsa pahnih an nihrual.
- Italian Serie A
Napoli mualah 2-0 a an chak vangin Bologna chuan a vawi khat nan Champions League an khel dawn chiang ta. Bologna hian 1964-65 khan European Cup an lo hmachhawn tawh a, UCL erawh an la hmachhawn phak ngai lo thung.
- German Bundesliga
Bayern Munich keeper Manuel Neuer chuan Bundesliga-ah vawi 500 (156 for Schalke, 344 for Bayern) a khel tling ta chiah a. Si nghak zingah Bundesliga-a khel hnem palina a ni a, a chungah hian Oliver Kahn (557), Eike Immel (534) leh Uli Stein (512) te an awm.
Bundesliga champion thar Bayer Leverkusen chu inelna hrang hrangah tlawm nei lovin khelh 50 chhung an kal tluang ta chiah a, an record siam an tizau zel. Leverkusen hian Bayern Munich in 1986-87 leh 2012-13 season ah Mimualah vawi 17 zet tlawm nei lo record an lo siam chu an nihrual bawk.
- French Ligue 1
Champion thar PSG chu an mikhual Toulouse lakah 1-3 in an tlawm a, Ligue 1-ah tlawm nei lova khelh 26 chhung an kal tluang lai tihtawpsak an ni. Season kal mekah khelh 26 chhung tlawm nei lova an kal tluang hi Ligue 1-ah bik tlawm nei lova an kal tluan rei parukna a ni a. Tlawm an neih loh zawn rei ber chu 2025-16 season-a khelh 36 chhung zet tlawm nei lova an kal tluan tum kha a ni.
An mualah ngei an tlawm tak vangin player ropui Kylian Mbeppe-a’n an muala a khelh hnuhnung berah hnehna chan ngei a tuma a hlawhchham bawk. Mbappe hian contract hmang zovin PSG hi a chhuahsan dawn a, Real Madrid a zawm ngei tura ngaih a ni.
- Messi-Ronaldo watch
MLS ah khelh 6 chhung goal thawkchhuak zawn tawh a, MLS a goal thawkchhuak zawn rei record siamtu Lionel Messi chuan season kal meka a vawi khat nan goal a thawkchhuak zo lo. Inrinni ah Inter Miami in 3-2 a CF Montréal an hneh tumin Messi hian goal a thun lova, assist a nei lo bawk.
Al-Nassr tan Cristiano Ronaldo a chetha chhunzawm zel a, 3-2 a an chak tumin Ronaldo hian season kal meka a goal 33-na a thun.