German champion thar Bayer Leverkusen chuan an boss Xabi Alonso hnuaiah tlawm pumpelh chhunzawm zelin, Pathianni zan Bundesliga inkhel pakhatah 5-0 tehrengin mualneitu Bochum an sawp a, tun season inelna hrang hrangah game 50 zet an tlawm lo tling ta!
Alonso team hian invincible treble zinkawng an zawh mek laiin tlawm nei loa league khel zo turin game khat hmabak an la nei a, kartawp Inrinni zan hian an league game hnuhnungber turah Augsburg an mikhual dawn a, he ta tlawm an pumpelh leh theih chuan tlawm nei miah loa Bundesliga season khat hmang zo thei team hmasaber an ni tawh ang.
German club hlawhtlingber Bayern Munich meuh pawhin chu chu an tih theih loh a la ni a, kum 1986-87 leh 2012-13 title an lak tum khan vawi khat ve ve an tlawm khanglang a!
May ni 22 khian Dublin khawpuiah Bundesliga champion thar Leverkusen hian Europa League final khelin Italian club Atalanta an hmachhawn dawn a, nithum hnuah Kaiserslautern nen Berlin khawpuiah German Cup final an khel zui leh dawn a, final khelh hniha an chak ve ve chuan treble champion ni chungin season an khar thei dawn a, league game khelh hmabak vawikhat an la neiha tlawm an pumpelh leh bawk chuan season an khar dan hian an club chanchin mai ni lo German football-ah sawi a hlawh kumkhua tawh dawn a ni.
Tun-a-pangin hming lemah ‘Never-kusen’ tih an hlawh der tawh a nia!
- Bayern Munich 2-0 VfL Wolfsburg
Pathianni inkhel dangah Bayern chuan hnehnain an final home game an thlahliam.
Bundeslkiga table-a pahnihna luahtu Bavarians hi a hma ni li kalta mai khan Champions League semi-final atangin an tla fel a, thangkhat lian zet chhunga trophy tel loa season an hmanliam vawikhatna turah Thomas Tuchel leh a naute chuan hnehnain an home game an thlahliam ta a ni.
He inkhelah hian hnungzang na tenau avangin an star striker Harry Kane an chhawr thei lo a, Real Madrid an tlawm tuyma inhliam Serge Gnabry bakah an first team player dang Leroy Sane leh Jamal Musiala an lut lo bawk.
Pathianni zan khan an goal-veng ropui Manuel Neuer-a mellung thar phun zan niin, Bundesliga game 500 a khel tling ta a, he league history-a heti zat khel tling goalkeeper palina chiah a ni.