May 15, Nilai zan khan English Premier League (EPL) khelh chhunzawm a ni a, team lian leh hausa, season kal meka beisei phak lo panih; Chelsea leh Manchester United ten hnehna an chang ve ve. Chelsea in Mimualah Brighton & Hove Albion an hneh a. Manchester United in an mikhual Newcastle United chu 3-2 in an lo hneh ve bawk.
Sum seng hnem chunga beisei phak lo reng, season tawp dawn hnaiah chak thiam thar ta tlat Chelsea chu Brighton hmachhawn turin American Express Stadium-ah an lenglut. Blues hian an lenluhna mualah 2-1 in hnehna an chang a, Europa League khel thei dinhmunah an inhlangkai.
Chelsea hian an lenluhna mualah khel tha thawkhat viau mah se goal erawh an thun thei mai lo. Goal lut a awm theih loh reng hnuin Season kal meka khel tha tluang tak Cole Palmer chuan minute 34-naah hmahruaina goal a thun. Chelsea in Manchester City atanga an lak luh Palmer hian a club thar Chelsea tan EPL-ah vawi 33 khelin goal 22 zet a thun tling tawh a, a chetha hle. EPL 2023-24-ah hian khelh 30 atanga goal 27 thun tling tawh Erling Haaland chu top-scorer a ni mek a, Palmer hian Silver boot a dawng ngei tura ngaih a ni. City atanga an lakna man a to lo viau a, Chelsea hian Palmer hi an la lut fuh tak zet zet a ni.
Palmer goal thun hnu hian goal dang a luh belh thei lo reng a, inkhel hmuhnawm takah Chelsea hi goal thun hmasa zawkah an tang nawn leh. Si khata hmahruai tawh Christopher Nkunku chuan minute 64-naah an goal hnihna a thun a, an hmahruai na a tizau. 2-0 a hma an hruai hnu hian Chelsea captain Reece James chu minute 88-naah hnawhchhuah a ni. EPL-ah hian a zawna straight red card hmu zawnte chu game li khel thei lo tura hrem tur an ni a. Reece James hian season kal meka game khat bakah season thara EPL game hmasa pathum a khel thei dawn lo.
James hnawhchhuah a nih hnu hian Brighton in na zawkin an khingpuite an nawr a, hun pek belh tawp dawn hnaih minute 90+7 ah Danny Welbeck chuan goal thunin an si phurh a sut then. An si phurh an sut vangin phur viau mah se Brighton hian goal an thun belh thei tawh lova, an mualah ngei uiawm takin an tlawm zui ta a ni.
Brighton lakah an chak leh tak vangin Chelsea hi paruknaah an inhlangkai a, hma an sawn chak hle. Paruknaah awmin, point thumin sang fal mek mah se Europa league khel turin Blues hi an la tling chiang bik lo thung a, a match hnuhnung berah point an la mamawh. Table laihawl chhuahsan hleithei meuh lo thin kha an ni a. Season tawp dawn hnaih lamah chak an thiam thar a, Manchester United chungah awm in, parukna an ni ta hial a ni.
- Højlund-a’n goal a thun
Nilai zana inkhel dangah Manchester United chuan Old Trafford a an mikhual Newcastle United chu 3-2 in an lo hneh. United tan hian khelh ruk chhung zet goal thun tawh lo Rasmus Højlund chuan goal a thun a, a harsatna tawh a sukiang.
An mualah United khel tha viau mah se goal erawh an thun mai thei bik lo. Chawlhlawk dawn hnaih minute 31-naah Kobbie Mainoo chuan hmahruaina goal a thun a, 1-0 a hmahruai chungin chawlhlawk an hmang.
Chawlhlawk hnu lamah Newcastle United in bul an tan tha ve thung a, goal an thun nghal thuai. Second half tan atanga minute lina lekah club lian zawkte pawhin an awh em em Anthony Gordon chuan goal thunin, an si phurh a sut. An goal thun vangin phur viau mah se United an chhaihkawlh a, goal hnih an chhuah zawn.
United tan hian Amad chuan minute 57-naah goal thunin hma an hruai nawn lehna goal a thun a. Goal thun mamawh Rasmus Højlund chuan minute 84-naah goal thunin an hmahruaina a tizau. Si hnih an phurh hnuin Newcastle tan Lewis Hall chuan hun pek belhah goal thun leh bawk mah se an si phurh an sut zo thei lo va, an tlawm zui ta a ni.