May 15, Nilai zan khan Coppa Italia final khelh a ni a, inkhel hmuhnawm takah Juventus chuan si khat faiin Atalanta an hneh a, a vawi 15 nan an champion.
Coppa Italia final hi AS Roma mual, Olimpico-ah khelh a ni a, vawi 14 champion tawh Juventus in bul an tan tha hle. Inkhel tan atanga minute lina lekah Dusan Vlahovic chuan Andrea Cambiaso hnen atanga ball a hmuh tha tak chu goal-ah a chantir a, hmahruaina goal a thun. EPL club leh ram dang club te pawhin lak tuma an ngaihven Vlahovic hian hun tawp dawn hnaih lamah goal thun belh mah se offside vangin hnawl a ni thung. Atalanta hian an si phurh sut tumin tan an khawh nasa viau a, woodwork vawi hnih tih per mah se goal an thun thei lo tluan.
Minute lina leka goal a luh hnu hian goal dang a luh belh thei tawh lo va, Juventus chu Coppa Italia champion thar an ni a, kum thum zet trophy chawi lova an awm hnuin trophy an chawi ve leh ta. Italian club lian leh ropui Juventus hi Coppa Italia champion ngun ber an ni a, an record tizau in, a vawi 15 nan an champion leh ta a ni. Juventus lakah an tlawm leh tak vangin kum 1963 hnuaa a vawi khat nan Coppa Italia champion nih an tumna Atalanta hian an puitlin zo lo. Coppa Italia-ah champion zo lo mah se kar tharah khian Europa League final an khel zui leh nghal dawn a, trophy lian lak theihna hun remchang erawh an la nei tho thung.
Final hmuhnawm leh boruak sang takah hian Juventus manager Massimiliano Allegri hnawhchhuah a ni hial. Allegri hian Coppa Italia-ah a club enkawl vawi nga a champion pui tawh a, manager zingah Coppa Italia-a champion ngun ber a ni.