World Champion Argentina chuan Zirtawp zan khan Copa America khel tura inbuatsaihna hnuhnung an hmachhawn a, Quatemala an hmachhawn a, Lionel Messi leh Lautaro Martinez te hnih thun hmangin hnehna an chang.
Argentina hian FedExField, USA ah Guatemala an hmachhawn a, goal an chhuah hma hle. Inkhel tan atanga minute lina lekah defender Lisandro Martinez chuan an lamah a ti-goal palh a, Quatemala hmahruaina goal a thunsak. Goal chhuah hma viau mah se Argentina an buai lova, an si phurh an sut thuai. Minute 12-naah Lionel Messi chuan goal thunin an si phurh a sut.
An si phurh an sut hnuin Argentina an khel tha chhunzawm a, chawlhlawk hmain goal an thun belh leh. Minute 39-naah penalty an hmuh chu ram tan goal thun mamawh Lautaro Martinez chuan a pet goal a, hma an hruai letna goal a thun a, 2-1 a hmahruai chungin chawlhlawk an hmang.
Chawlhlawk hnu lamah La Albiceleste an khel tha chhunzawm a, goal hnih an thun belh leh. Hma an hruai letna goal thuntu Martinez chuan minute 66-naah goal thunin an hmahruaina a tizau a. Minute 77-naah Lionel Messi chuan an goal lina thunin, an chakna a nem nghet zui leh bawk.
June 21, Zirtawp ni hian Copa America khelh tan a ni tawh dawn a. Argentina hian an trophy kawl mek humhim tumin inelna lian an hmachhawn ang. Champion lai Argentina hian Zirtawp zing dar 5:30-ah Canada hmachhawnin bul an tan ang.