Mizoram tualchhung football club te inelna ngaihhlut zinga mi GIG Motors I Day Football Tournament 2024 chu July 31, Nilaini khan RG Stadium-ah khelh tan a ni a. MPL hmahruaitu Chanmari FC in SYS FC hnehin point thum nen bul an tan.
MPL 11 a team hmuhnawm pahnih Chanmar FC leh SYS FC te hian hmuhnawm takin bul an tan a, goal pawh a lut lawk thei lo. MPL lama an chhawr tam loh player tam zawk hmanga Chanmari FC hmachhawn SYS an chesual a, chawlhlawk hmain penalty an chawi. Penalty an hmuh hi Chanmari FC tan MS Dawngliana chuan a pet goal a, minute 41-naah hmahruaina goal a thun. Dawngtea goal thun hmang hian 1-0 a hmahruai chungin chawlhlawk an hmang.
Hmahruaitu ni chunga second half bul tan Chanmari FC hi an che fuh lo va, minute 52-na lekah midfielder Rokima hnawhchhuah a ni. Tlem zawk an nih hnuin goal an chhuah zui thuai a, minute 59-naah Lalduhawma chuan penalty atanga goal thunin SYS si phurh a sut. An si phurh an sut vangin SYS an phur viau a, tam zawk an nih tel bawk vangin chak ngei tura ngaih an ni hman.
Second half tir te atangin kim lo zawk ni bawk mah se Chanmari FC an buai zui lova an insiamtha thuai. Hun rei tak chhung goal lut a awm belh theih loh hnuin hun tawp dawn hnaih minute 86-naah Lalnunzira chuan Chanmari FC hmahruai nawn lehna goal a thun a. He goal hmang hian SYS lakah hnehna pawimawh tak an chang zui ta a ni.
I Day Football Tournament 2024-ah hian MPL team pariat bakah Bethlehem Vengthlang FC leh North East United FC an tel.