Bairabi leh Sairang inkar Rel kawng siam mek, Bairabi atanga 16 kms a awm Hortoki Station chin chu nimin khan Ministry of Civil Aviation hnuaia Commissioner of Railway Safety chuan a endik a, Hortoki Station thlengin Rel Pindan 12 tlan thlenpui a ni a, Rel ah hian hnathawktute an chuang a ni.
Nimina endikna ah hian Rel chu chak taka tlan tir a ni a, Lei dawh a that tawk dan te, Tunnel awm dan te bakah Signal leh Traffic chungchang te endik a ni.
Railway hotute chuan Endiktu te hian an endikna report an ziak ang a, him tawka an hriat chuan Bairabi atangin Hortoki Station inkar ah Bungrua leh Khualzin phur chi Rel a tlan thei tawh ang an ti a. Endiktu ten siam that ngai awm nia an hriat chu siam that a ni bawk ang an ti.
Rel kawng siam mek hi kum 2025 July thla ah chuan Sairang Station thlenga Rel tlan tir theih an beisei tawh a, tunah hian Kawnpui Station thleng chuan hnathawktuten bungrua thiar nan Rel kawng hi an hmang mek tawh a ni.
Hortoki Station ah hian engkim an peih fel tawh niin an sawi a, Rel tlan lai kaihhruaina tur Khawl hrang hrang pawh hman chhin vek an ni bawk.
Commissioner of Railway Safety hi Guwahati atangin Officer thahnem takin an rawn tawiawm a, Mizoram Sawrkar atangin Hrangtawna Railway Consultant a tel bawk.